Türkmenistan–Owganystan–Päkistan–Hindistan (TAPI) gaz geçirijisiniň gurluşygynyň Owganystan böleginde 200-den gowrak döwrebap tehnikanyň işledilýändigi mälim edildi. Bu barada Türkmenistanyň Halk Maslahatynyň Başlygy we Halkyň Milli Lideri Gurbanguly Berdimuhamedow Serhetabat–Herat ugrunyň gurluşygynyň başlanmagyna bagyşlanan dabarada aýtdy.

Berdimuhamedowyň bellemegine görä, bu taslama sebitde ykdysady durnuklylygy we hyzmatdaşlygy berkitmekde möhüm orun eýeleýär. Uzynlygy 214 kilometr bolan türkmen bölegi ýerli hünärmenler tarapyndan üstünlikli tamamlandy.

Döwlet derejesinde berilýän goldaw bilen gurluşyk işleriniň ýerine ýetirilmegi üçin kuwwatly tehnikalardan ybarat döwrebap binýad döredildi. Häzirki wagtda gurluşyk meýdançasynda kuwwatly we täze enjamlar netijeli ulanylýar.

Şeýle hem, taslamanyň durmuşa geçirilmegine owgan raýatlarynyň giňden gatnaşdyrylmagy meýilleşdirilýär. Bu bolsa müňlerçe täze iş ýeriniň döredilmegine we Owganystana ýylda 1 milliard amerikan dollaryndan gowrak girdejiniň gelmegine mümkinçilik döreder.

Berdimuhamedow şeýle iri taslamalaryň ýurtlaryň arasyndaky gatnaşyklara oňyn täsir edýändigini belläp, olaryň sebitiň uzak möhletli ösüşine täze itergi berýändigini nygtady. Ol gaz pudagynyň işgärlerine we owgan tarapyna minnetdarlyk bildirdi.