TDH habar bermegine görä, türkmen halkynyň milli lideri, Türkmenistanyň Halk Maslahatynyň Başlygy Gurbanguly Berdimuhamedow Azerbaýjanyň prezidenti Ilham Aliýewi telefon söhbetdeşligiň dowamynda özüne amatly wagtda Türkmenistana çagyrdy.

Telefon söhbetdeşligi ýekşenbe güni geçirildi. Taraplar iki ýurduň arasyndaky häzirki ýokary derejäni kanagatlanma bilen bellediler.

"Söhbetdeşlikde Prezident Ilham Aliýewiň Amerikanyň Birleşen Ştatlaryna sapary wagtynda gazanylan ylalaşyklarynyň we gol çekilen resminamalarynyň ähmiýeti nygtaldy. Gahryman Arkadagymyz Prezidenti we dostlukly ýurduň halkyny bu taryhy şertnamalara ýetmegi bilen gutlady" -diýdi.

Şeýle hem Ilham Aliýew Halk Maslahatynyň başlygyny we Türkmenistanyň prezidentini Awazada geçirilen BMG-nyň deňze çykalgasy bolmadyk ösüp barýan döwletler boýunça üçünji maslahatynyň üstünlikli tamamlanmagy bilen gutlady we Azerbaýjan delegasiýasyna myhmansöýerlik üçin minnetdarlyk bildirdi.

Söhbetdeşlikde Awazada geçirilen Türkmenistanyň, Özbegistanyň we Azerbaýjanyň arasyndaky üçtaraplaýyn duşuşygyň ähmiýeti nygtaldy. Şunuň bilen baglylykda, söhbetdeşler üç ýurduň arasynda giň ugurlarda, hususan-da ulag we aragatnaşyk geçelgelerini ösdürmekde hyzmatdaşlygy mundan beýläk-de giňeltmek üçin uly mümkinçilikleriň bardygyny bellediler.

Şeýle hem Awazanyň Kongresler merkezinde Merkezi Aziýa ýurtlarynyň döwlet Baştutanlarynyň ýygnagynyň geçirilendigi, güýzde Daşkende geçiriljek Merkezi Aziýa ýurtlarynyň Baştutanlarynyň Konsultatiw maslahatyna degişli meseleleriň ara alnyp maslahatlaşylandygy bellenildi. Duşuşykda Gurbanguly Berdimuhamedowyň bu hyzmatdaşlyk formatyna Azerbaýjana goşulmak başlangyjy öňe sürüldi.

Söhbetdeşlik wagtynda taraplar ikitaraplaýyn gatnaşyklaryň ileri tutulýan ugurlary barada pikir alyşdylar.

Telefon söhbetdeşligi azerbaýjan tarapynyň başlangyjy bilen geçirildi.