«Awatar: Ot we kül» atly üçünji bölüm dünýä kinoteatrlarynda görkezilýän döwründe 1 milliard dollar girdeji çägini üstünlikli geçdi. Film 2025-nji ýylyň 19-njy dekabrynda prokata çykarylyp, gaty gysga wagtda — iki hepdeden sähel gowrak möhletde — bu ýokary maliýe netijesine ýetdi.

Bu görkeziji bilen franşizanyň awtory Jeýms Kemeron kino taryhynda aýratyn orna eýe boldy. Ol birbada dört filmini dünýä prokatynda 1 milliard dollardan ýokary girdeji getiren ýeke-täk režissýor hökmünde tanaldy. Ozal «Titanik», ilkinji «Awatar» hem-de «Awatar: Suwuň ýoly» filmleri hem şu sepgide ýetipdi. «Titanik» filmi 1997-nji ýyldan bäri 2,2 milliard dollar gazandy, 2009-njy ýylda çykan «Awatar» bolsa 2,9 milliard dollar bilen kino taryhynda iň girdejili film bolmagynda galýar. Ikinji bölüm «Suwuň ýoly» 2,3 milliard dollar netije görkezdi.

Üçünji bölümiň ýokary üstünlikleri «Awatar» taslamasyna kino taryhynda iň girdejili trilogiýa derejesini berdi. 2025-nji ýylyň 29-njy dekabryna çenli üç filmiň umumy girdejisi 6 milliard dollardan geçdi. Şol wagta çenli «Ot we kül» filmi eýýäm 760 million dollardan gowrak girdeji gazanypdy.

«Awatar 3» Disney studiýasynyň hem maliýe görkezijilerini güýçlendirdi — studiýa 2019-njy ýyldan bäri ilkinji gezek ýyllyk kassa ýygymynda 6 milliard dollar derejesinden geçdi. 2025-nji ýylda Disney üçin iň girdejili taslamalar «Haýwanlar şäheri 2» (1,3 milliard dollar) hem-de «Lilo we Stiç» (1 milliard dollar) boldy.

Filmiň wakalary wulkanlaryň golaýynda ýaşaýan, has gazaply häsiýetli Na’wi taýpasynyň durmuşyna bagyşlanýar. Hekaýanyň gürrüň berijisi hem üýtgeýär — indi wakalar Jeýk Salliniň däl-de, onuň ogly Loagyň dilinden beýan edilýär. Baş keşpleri öňküsi ýaly Sem Wortington, Zoý Saldana, Keýt Winslet we Sigurni Wiwer ýerine ýetirdiler. Film dünýä bilen bir hatarda Türkmenistan kinoteatrlarynda hem uly gyzyklanma döretdi.