Türkmenistan–Owganystan–Pakistan–Hindistan gaz geçiriji taslamasy diňe bir energetika ulgamy bilen çäklenmän, eýsem sebitde dostlugyň, hyzmatdaşlygyň we ykdysady özara bähbitleriň nyşany bolup çykyş edýär. Bu barada Owganystanyň ykdysady meseleler boýunça wise-premýeri Abdul Gani Baradar Serhetabat–Herat ugrunda gaz geçirijiniň täze tapgyrynyň gurluşygyna bagyşlanan dabarada aýtdy.

Baradaryň bellemegine görä, TOPH taslamasy gatnaşyjy ýurtlaryň arasyndaky ynamy güýçlendirýän we bilelikdäki durnukly ösüşe hyzmat edýän möhüm başlangyçdyr. Strategik ähmiýeti bolan bu taslama häzirki wagtda üstünlikli durmuşa geçirilýär.

Wise-premýer bu taslamanyň müňlerçe adamy iş bilen üpjün etjekdigini we sebit ýurtlarynda ykdysady ösüşe täze itergi berjekdigini aýtdy. Şeýle hem, Owganystan TAPI taslamasyny diňe ykdysady mümkinçilik hökmünde däl, eýsem Türkmenistan bilen gatnaşyklaryň ösdürilmegine gönükdirilen möhüm ädim hökmünde görýär.

Gaz geçirijiniň ugrunda degişli düzümler dörediler: elektrik geçirijiler, awtomobil we demir ýollar, şeýle-de logistika merkezleri. Bu bolsa sebitde täze söwda-ykdysady ulgamynyň döremegine mümkinçilik döreder.

Baradar çykyşynyň ahyrynda Türkmenistanyň ýolbaşçylaryna hoşallyk bildirip, türkmen we owgan halklarynyň arasyndaky gatnaşyklar dostluga we ruhy-medeni umumylyk esaslanýandygyny nygtady.