Şu gün Türkmenistanda, Aşgabat şäherinde türkmen-rus gatnaşyklarynyň möhüm ugurlaryny öz içine alan syýasy geňeşmeleriň nobatdaky duşuşygy boldy. Geňeşmelere Türkmenistanyň daşary işler ministriniň orunbasary Ahmet Gurbanow hem-de Russiýa Federasiýasynyň daşary işler ministriniň orunbasary Mihail Galuzin gatnaşdy.

Duşuşykda Türkmenistan bilen Russiýanyň arasyndaky hyzmatdaşlygyň häzirki ýagdaýy we geljekki ösüş mümkinçilikleri giň gerimde ara alnyp maslahatlaşyldy. Taraplar strategik derejedäki dostlukly, açyk we birek-birege ynamly gatnaşyklaryň yzygiderli ösdürilýändigini aýratyn nygtadylar.

Şeýle-de, Türkmenistan bilen Russiýanyň hyzmatdaşlygynyň diňe ikitaraplaýyn däl, eýsem köptaraplaýyn meýdançalarda hem üstünlikli ilerleýändigi bellenildi. Bu babatda Birleşen Milletler Guramasynyň, Garaşsyz Döwletleriň Arkalaşygynyň çägindäki özara gatnaşyklar, şeýle hem «Merkezi Aziýa – Russiýa» formaty aýratyn ähmiýetli hyzmatdaşlyk meýdançalary hökmünde görkezildi.

Diplomatlar 2025–2026-njy ýyllar üçin kabul edilen hyzmatdaşlyk maksatnamasynyň esasynda Türkmenistanyň we Russiýanyň daşary syýasat edaralarynyň arasynda dialogy has-da işjeňleşdirmäge taýýardygyny tassykladylar.

Geňeşmeleriň dowamynda sebit howpsuzlygy, durnukly ösüş we halkara durnuklylygyny üpjün etmek bilen baglanyşykly meseleler hem giňden ara alnyp maslahatlaşyldy.