Türkmenistanyň Aragatnaşyk ministrligi tarapyndan IT-tehnologiýalary, emeli aňy we robot tehnikasyny ösdürmäge gönükdirilen innowasion taslamalaryň bäsleşigi — «Sanly çözgüt–2025» boýunça saýlama tapgyr badalga aldy.

Bäsleşik aşakdaky ýedi ugur boýunça guralýar:

• emeli aň;

• robot tehnikasy we awtomatlaşdyrma;

• “akylly” oba hojalyk tehnologiýalary;

• akylly şäher konsepsiýalary;

• sanly saglygy goraýyş;

• elektron bilim;

• hyzmatlar ulgamynyň sanlylaşdyrylmagy.

Toparlaryň işleri döwrebaplyk, innowasion derejesi, ykdysady täsirli bolmagy, ulanmakdaky amatlylyk, dizaýnyň hil derejesi, kanunçylyga laýyklyk, pikiriniň özboluşlylygy we programma üpjünçiliginiň başlangyç kodunyň bolmagy ýaly ölçegler boýunça seljerilýär.

Ýeňijileri sylaglamak dabarasy 2025-nji ýylyň 12–14-nji noýabry aralygynda Aşgabatda Türkmenistanyň Söwda-senagat edarasynda geçiriljek «Turkmentel–2025» halkara sergisiniň hem-de ylmy maslahatynyň çäklerinde geçiriler.

Guramaçylar belleýändiklerine görä, bu bäsleşik diňe bir täze sanly çözgütleri ýüze çykarmak bilen çäklenmän, eýsem işewür gatnaşyklary ýola goýmaga, başlangyç taslamalary (startaplary) durmuşa geçirmäge we innowasiýalary ykdysadyýetde hem jemgyýetçilik ulgamynda ornaşdyrmaga ýardam edýär. Iň üstünlikli taslamalar goldaw tapar, bu bolsa ýurdumyzyň sanly ulgamyny ösdürmekde we täze IT hünärmenlerini taýýarlamakda möhüm orny eýeleýär.