Çarşenbe güni «Arkadag» futbol kluby AFK-2 Çempionlar ligasynyň 1/8 final tapgyrynyň ilkinji oýnunda Saud Arabystanynyň «Al-Nassr» toparyny kabul eder. Duşuşyk Aşgabat şäherindäki 45 müňden gowrak tomaşaça niýetlenen Olimpiýa stadionynda sagat 18:45-de başlanar.

Saud topary sişenbe güni paýtagta gelip, dabaraly garşylandy. «Al-Nassryň» baş tälimçisi Žorže Žezuş metbugat ýygnagynda Aşgabada gelendiklerine begenýändigini we «Arkadag» bilen boljak oýna uly hormat goýýandygyny aýtdy.

Tälimçi türkmen klubynyň ýaş topar bolandygyna garamazdan, eýýäm üstünlik gazanyp, çalt hem-de taktiki taýdan oýlanyşykly futbol görkezýändigini belledi. Şeýle hem garşydaşyň oýnuny seljerip, toparyny degişli derejede taýýarlanyklaryny aýtdy.

Žurnalistleriň Kriştianu Ronaldunyň gatnaşmagy baradaky sowalyna jogap hökmünde Žezuş onuň bu sapar topar bilen gelmändigini aýtdy. Onuň sözlerine görä, Saud Arabystanyndan daşary geçirilýän käbir myhmançylyk duşuşyklarynda hüjümçi meýdana çykmaýar. Munuň sebäbi toparyň içki çempionat we Aziýa ýaryşlaryndaky dykyz tertibi bilen baglydyr.

Ronaldu bilen birlikde Žoau Feliks, Sadio Mane, Kingsli Koman, Marselo Brozowiç, Inýigo Martines hem-de Gabriel Anželo hem Aşgabada gelmediler. Tälimçi öňde möhüm duşuşyklaryň bardygyny we öňdebaryjy oýunçylary artykmaç ýadawlykdan goramak isleýändigini aýtdy.

«Al-Nassryň» derwezeçisi Bento Mateus toparyň ýeňiş gazanmaga taýýardygyny aýtdy. «Arkadagyň» baş tälimçisi Mergen Orazow bu duşuşygy topar üçin öz mümkinçiliklerini görkezmegiň gowy pursady hökmünde häsiýetlendirdi we futbolçylarynyň ýokary taýýarlyk derejesindedigini nygtady. Goragçy Güýçmyrat Annagulyýew bolsa janköýerleri gowy netije bilen begendirmek üçin ähli güýjüni gaýgyrmajakdyklaryny aýtdy.