25–31-nji ýanwar aralygynda Türkmenistanyň bilim ulgamynyň wekilleri Angliýanyň Kembrij şäherine sapar edip, Merkezi Aziýa ýurtlarynyň ýokary okuw mekdepleriniň ýolbaşçylary üçin niýetlenen hünär kämilleşdiriş okuwlarynda gatnaşdy. Bu barada Bilim ministrliginiň resmi saýty habar berdi.

Wekiliýetiň düzümine Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmen döwlet mugallymçylyk institutynyň wekilleri girizildi.

Okuw maksatnamasy okuw sapaklaryny, seminarlary we tejribe alyşmak çärelerini öz içine aldy. Gatnaşyjylar PRESETT ulgamynda ýolbaşçylyk we strategik meýilnamalaşdyrma boýunça häzirki zaman çemeleşmeleri, mugallymlaryň hünär ösüşi boýunça dolandyryş tejribelerini we dowamatly okuw (CPD) modelini öwrenişdi.

Iňlis dilini okatmak, kommunikatiw we şahsyýete gönükdirilen usullary ulanmak, sanly okuw platformalaryndan, interaktiw usullardan we emeli aň tehnologiýalaryndan peýdalanmak aýratyn üns bilen öwrenildi. Okuw maksatnamalarynyň gurluşyny we netijeliligini seljermegiň usullary hem gözden geçirildi.

Diňleýjiler okuw sapaklaryna gatnaşyp, okatmagyň usulyýetini, okuw esbaplaryny we bilim netijelerini seljerdi. Şeýle-de, daşary ýurt dillerini öwrenmek maksatnamalaryny CEFR (Umumy Ýewropa Dil Bilim Derejelerini Bahalandyrmak Ulgamy) bilen utgaşdyrmak, diňläp düşünmek, okamak, gürlemek we ýazmak ukyplaryny baha bermek usullary maslahatlaşyldy.

Bu okuwlar halkara hyzmatdaşlygy berkitmäge we Merkezi Aziýa ýurtlarynyň, şol sanda Türkmenistanyň milli bilim ulgamlaryna öňdebaryjy tejribeleri ornaşdyrmaga gönükdirilendir.