Türkmenistanyň Bilim ministrliginiň wekillerinden we orta hünär tehniki okuw mekdepleriniň talyplaryndan ybarat bolan wekilçilik Täjigistan Respublikasynyň Hatlon welaýatynda guralan «International Skills Forum Tajikistan – 2026» atly halkara bäsleşige gatnaşdy. Bu çäre mazmuny we guralyşy boýunça bütin dünýäde meşhur bolan «WorldSkills» hereketiniň esasy kadalaryna we ýörelgelerine laýyklykda geçirildi. Halkara forum ýaş hünärmenleriň amaly başarnyklaryny synamak we önümçilik tejribelerini baýlaşdyrmak üçin esasy platforma boldy.

Hünär başarnyklarynyň synag meýdançasynda Täjigistandan, Özbegistandan, Gyrgyzystandan, Gazagystandan, Türkmenistandan, Hytaýdan we Türkiýeden gelen ýaşlar özara bäsleşdiler. Gatnaşyjylar elektrotehniki gurnawlar, gurluşyk-suwagçylyk işleri, elektrogazgurnaýjylyk, şeýle hem häzirki zaman Gün energetikasy enjamlaryny sazlamak ýaly senediň iň talap edilýän ugurlary boýunça bellenen ýumuşlary ýerine ýetirdiler.

Bäsleşigiň netijelerine görä, Türkmenistanyň Gurluşyk we binagärlik ministrliginiň Aşgabat gurluşyk orta hünär okuw mekdebiniň talyby Nepes Rahmanberdiýew ýokary taýýarlygyny görkezip, fahrly ikinji orny eýelemegi başardy. Şeýle hem Türkmenistanyň Energetika ministrliginiň Aşgabat energetika orta hünär okuw mekdebiniň diňleýjisi Ymamberdi Söhbetow öz ugrundan görkezilen tehniki tabşyryklary üstünlikli tamamlamagy başaryp, iň ozyjylaryň ilkinji dörttügine goşuldy.

Forumyň çäklerinde geçirilen maslahatlarda häzirki zaman zähmet bazarynyň talaplaryna laýyk gelýän ýaş hünärmenleri taýýarlamak hem-de iş berijiler bilen edaralaryň institusional hyzmatdaşlygyny berkitmek meseleleri ara alnyp maslahatlaşyldy. Mundan başga-da, okuw maksatnamasyna laýyklykda bäsleşige gatnaşyjylar üçin Nurek gidroelektrostansiýasyna gezelenç guraldy. Bu gezelenç ýaşlara tehniki we energetika ulgamyndaky amaly hereketleriň döwrebap önümçilik şertlerinde ýerine ýetirilişini synlamaga mümkinçilik berdi.