Ministrler Kabinetiniň mejlisinde wise-premýer Nokerguly Atagulyýew Dohada geçiriljek türkmen-katar Hökümetara söwda-ykdysady hyzmatdaşlyk komissiýasynyň mejlisine görülýän taýýarlyklar barada maglumat berdi.

Geçiriljek duşuşykda iki ýurduň strategik ugurlar boýunça hyzmatdaşlygyny giňeltmäge gönükdirilen dürli meseleleriň ara alnyp maslahatlaşylmagy meýilleşdirilýär. Gün tertibine söwda-ykdysady we maýa goýum hyzmatdaşlygy, maliýe-bank ulgamy, energiýa, ulag, aragatnaşyk, maglumat tehnologiýalary, oba hojalygy we ekologiýa bilen bagly meseleler girizildi.

Şol bir wagtyň özünde, taraplar bilim, ýaşlar syýasaty, sport we syýahatçylyk ugurlarynda medeni-ynsanperwer gatnaşyklary güýçlendirmek boýunça mümkinçilikleri ara alyp maslahatlaşarlar.

Hasabaty jemläp, Prezident Serdar Berdimuhamedow Katar bilen özara peýdaly ykdysady gatnaşyklary berkitmek ugrunda netijeli işleriň alnyp barylýandygyny belledi. Döwlet Baştutany komissiýanyň türkmen tarapyndan düzümini makullady we mejlisi üstünlikli geçirmek üçin wise-premýere degişli görkezmeleri berdi.