Türkmenistanyň karz edaralarynyň ýyllyk maliýe hasabatlaryny halkara standartlary esasynda barlamak boýunça degişli işler amala aşyrylar. Bu barada geçirilen Ministrler Kabinetiniň mejlisinde wise-premýer H.Geldimyradow hasabat berip, bank ulgamynyň işini seljermek baradaky meýilnamalary hödürledi.

Göz öňünde tutulýan barlaglar ýurdumyzyň auditorçylyk we bank işi baradaky kanunçylygyny kämilleşdirmäge gönükdirilendir. Şeýle hem bu çäreler buhgalterçilik hasaba alnyşyny halkara talaplaryna laýyk getirmek we maliýe hasabatlylygynyň täze nusgalaryna geçmek boýunça maksatnamalaryň bir bölegi bolup durýar.

Hormatly Prezidentimiz Serdar Berdimuhamedow bank ulgamynyň işini döwrebaplaşdyrmagyň döwlet syýasatynyň ileri tutulýan ugurlarynyň biridigini belledi. Döwlet Baştutany banklaryň maddy-tehniki we maliýe binýadyny berkitmek üçin halkara audit barlaglarynyň ähmiýetiniň uludygyny nygtady.

Hökümet Başlygynyň orunbasaryna maliýe edaralarynyň işiniň aýdyňlygyny üpjün etmek we audit çäreleriniň ýokary hilli geçirilmegini gazanmak boýunça anyk tabşyryklar berildi. Bu işleriň netijeleri bank ulgamynyň dolandyryş netijeliligini ýokarlandyrmaga we ykdysady durnuklylygy berkitmäge ýardam eder.