Oýun sanawy
Türkmenistan bilen Özbegistan giň gerimli ikitaraplaýyn resminamalary kabul etdi
17 Noý. 14:26Daşkentde geçirilen ýokary derejeli gepleşikleriň jemleri boýunça Türkmenistanyň Prezidenti Serdar Berdimuhamedow we Özbegistanyň Prezidenti Şawkat Mirziýoýew bilelikdäki Beýannama gol çekdiler.
Şeýle hem döwlet Baştutanlarynyň gatnaşmagynda dürli ugurlary öz içine alýan birnäçe resminama alyş-çalyşygy geçirildi. Olaryň hatarynda:
– Türkmen-özbek serhet söwda zolagynyň işini düzgünleşdirýän ylalaşyk;
– saglygy goraýyş hem-de lukmançylyk ylmy boýunça hyzmatdaşlyk barada şertnama;
– oba hojalygynda hyzmatdaşlygy ösdürmek baradaky ylalaşyk;
– adatdan daşary ýagdaýlaryň öňüni almak we olaryň netijelerini aradan aýyrmak baradaky hökümetara ylalaşyga girizilen goşmaça protokol;
– halkara awtopasssyrjy we ýük daşamalar boýunça hökümetara ylalaşyga goşmaça protokol;
– 2026–2027 ýyllar üçin adalat ministrlikleriniň hyzmatdaşlyk maksatnamasy;
– 2026–2027 ýyllar üçin medeniýet ugrundaky hyzmatdaşlyk maksatnamasy;
– nebit önümlerini we suwuk himiki ýükleri daşamak üçin niýetlenen ýörite ýolagly wagonlaryň üpjünçiligi baradaky memorandum;
– biologik howpsuzlyk meseleleri boýunça özara düşünişmek baradaky memorandum;
– Özbegistanyň Prezidentiniň ýanyndaky Strategiki we sebitara barlaglar instituty bilen Türkmenistanyň DIM-niň Halkara gatnaşyklary instituty arasynda türkmen-özbek ekspert geňeşini döretmek baradaky memorandum;
– Özbegistanyň Prezidentiniň ýanyndaky Kanunçylyk we hukuk syýasaty instituty bilen Türkmenistanyň Döwlet, hukuk we demokratiýa instituty arasynda hyzmatdaşlyk baradaky memorandum;
– 2026–2030 ýyllar üçin tokaý hojalygy boýunça «ýol kartasy»;
– welaýatlar we welaýatlaryň arasynda söwda-ykdysady, ylmy-tehniki we medeni-ynsanperwer hyzmatdaşlyk boýunça baglaşylan sebitleýin ylalaşyklar.
Bu toplumy resminamalar türkmen-özbek strategik hyzmatdaşlygynyň täze, ulgamlaşdyrylan ösüş tapgyryna geçendigini görkezýär.
Aýratyn ähmiýetli aýratynlyk — welaýatlaryň we sebitleriň derejesindäki hyzmatdaşlyga gönükdirilen giň möçberli ylalaşyklar bolup, olar sebitleýin integrasiýa üçin berk hukuk esasyny döredýär. Gepleşikleriň netijesinde söwda-ykdysady gatnaşyklary, ulag-logistika hyzmatdaşlygyny, ekspert derejesindäki işleriň we ynsanperwer gatnaşyklarynyň ähli ugry öz içine alýan bitewi hukuk binýady kemala geldi.
Kabul edilen resminamalar döwlet Baştutanlary tarapyndan öňde goýlan maksatlaryň durmuşa geçirilmegini üpjün edip, iki doganlyk ýurduň hem-de tutuş Merkezi Aziýa sebitiniň durnukly ösüşine we abadançylygyna hyzmat eder.
Şeýle hem okanyň
Türkiýe Respublikasynyň Aşgabatdaky Ilçisi türkmen metbugat wekilleri bilen duşuşyp, ikitaraplaýyn hyzmatdaşlygyň geljekki ugurlaryny maslahatlaşdy
24 Okt. 13:042026-njy ýylyň 24-nji oktýabrynda Türkiýe Respublikasynyň Türkmenistandaky Adatdan daşary we Doly ygtyýarly Ilçisi jenap Şener Jebeji Ilçihananyň resmi rezidensiýasynda türkmen köpçülikleýin habar beriş serişdeleriniň wekilleri bilen tanyşlyk ertirlik naharyny gurady. Duşuşyk dostlukly we işjeň ýagdaýda geçirilip, iki ýurduň arasyndaky köpýyllyk hyzmatdaşlygy, medeni-ynsanperwer baglanyşyklary hem-de syýahatçylyk ugry boýunça gazanylan sepgitleri jemlemäge we täze bilelikdäki taslamalary maslahatlaşmaga giň mümkinçilik döretdi.
Dostlukly duşuşygyň dowamynda Ilçi Şener Jebeji metbugatyň ýurtlaryň we halklaryň arasyndaky köprüleri berkidýän hem-de dostlukly gatnaşyklary geljege ugrukdyrýan iň güýçli sütünleriň biridigini aýratyn belledi. Şol bir wagtda ol TRT-niň Aşgabatdaky wekilhanasynyň köp ýyllaryň dowamynda alyp barýan işleriniň we «TRT Awaz» teleýaýlymynyň bütin türki dünýäsine ugrukdyrylan alyp berişleriniň bu ugurda nusgaly mysaldygyny nygtady. Ilçi Türkmenistanyň döwlet we hususy habar beriş serişdeleri bilen ýakyn hyzmatdaşlygy mundan beýläk hem işjeňleşdirmäge açykdyklaryny beýan etdi.
Duşuşykda soňky döwürde Türkmenistanyň habar beriş serişdeleriniň wekilleri üçin Türkiýe Respublikasynda guralan netijeli saparlar we kabul ediş maksatnamalary barada giňişleýin maglumat berildi. Hususan-da, 2026-njy ýylyň 28-nji sentýabry – 4-nji oktýabry aralygynda Türkiýäni Ösdürmek Agentligi (TGA) tarapyndan Gaziantepde we Şanlyurfada türkmenistanly iki žurnalist kabul edildi. Olar 30-njy sentýabr – 4-nji oktýabr aralygynda Şanlyurfa howa menzilinde geçirilen «TEKNOFEST» awiasiýa, kosmos we tehnologiýalar halkara festiwalynyň çärelerine ýakyndan gatnaşdylar.
Mundan başga-da, TGA hem-de «Türk howa ýollary» (THY) kompaniýasynyň Aşgabat wekilhanasynyň hyzmatdaşlygynda, Türkiýäniň Ilçihanasynyň goldamagynda 2026-njy ýylyň 10–14-nji oktýabry aralygynda 11 adamdan ibarat türkmen wekiliýeti (10 metbugat wekili we ýerli işgär) Çanakkale we Balykesir welaýatlaryna sapar etdi. Žurnalistler saparyň çäklerinde Zeýtun ýagy muzeýinde, Kaz daglarynda, Assos hem-da Troýa gadymy şäherlerinde, Troýa muzeýinde, Gelibolu taryhy zolagynda we Çanakkala şehitleriniň ýadygärliginde bolup, sebitiň baý taryhy-medeni mirasy bilen tanyşdylar. Umumylykda, 2023–2026-njy ýyllarda geçirilen 14 sany kabul ediş maksatnamasynyň çäklerinde Türkmenistandan jemi 84 adam Türkiýäniň dürli sebitlerinde myhmançylykda boldy.
Iki ýurduň arasyndaky syýahatçylyk ugry bоýunça görkezijiler hem çalt depginler bilen artýar. Maglumatlara görä, 2026-njy ýylyň ýanwar–awgust aýlarynda Türkmenistandan Türkiýä gelen myhmanlaryň sany 151 887 adama ýetip, bu görkeziji 2025-nji ýylyň degişli döwri bilen deňeşdirilende 20,46 göterim artdy. Türkiýäniň syýahatçylyk pudagy hem global derejede uly üstünlikleri gazanýar: 2017-nji ýylda dünýäde iň köp syýahatçy kabul eden ýurtlaryň arasynda 8-nji orunda duran Türkiýe 2024-nji ýylda 4-nji orna geçdi. Ýurt 2025-nji ýylda 64 million myhmany kabul edip, 65,2 milliard dollar girdeji bilen rekord goýan bolsa, 2026-njy ýylda 68 milliard dollar girdejä ýetmegi maksat edinýär.
Duşuşygyň soňunda Ilçi Şener Jebeji bu tanyşlyk ertirlik naharynyň geçirilen saparlary jemlemek we geljekde bilelikde ädilip bilinjek täze ädimleri maslahatlaşmak üçin örän gymmatly mümkinçilik bolandygyny tassyklady. Ol Ilçihananyň metbugat wekillerinden gelip gowuşjak ähli hyzmatdaşlyk tekliplerini seljermäge taýýardygyy hem-da bilelikdäki taslamalary amala aşyrmakdan razy boljakdygyny bilidirdi.
Şeýle hem diplomatik wekilçiligiň ýolbaşçysy Türkiýe bilen Türkmenistanyň arasyndaky gatnaşyklary täze ýokary derejä çykarjak möhüm ýokary derejeli sammitlere we ýubileý çärelerine yzygiderli taýýarlyk görülýändigini belledi. Türkiýe Respublikasynyň Prezidenti Rejep Taýyp Erdoganyň, Türkmenistanyň Prezidenti Serdar Berdimuhamedowyň we Türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň berk syýasy erk-islegine daýanyp, Ilçihana ikitaraplaýyn birleşikde we iki doganlyk halkyň bähbidine hyzmatdaşlygy ähli ugurlar boýunça ösdürmek ugrundaky işlerini durnukly dowam etdirer.
Şeýle hem okanyň
Blitz