Türkmenistanyň Telekommunikasiýalar we informatika institutynyň (TT we II) iň zehinli talyplary şu ýylyň 21-nji iýuny bilen 13-nji iýuly aralygynda Rumyniýanyň Kluž-Napoka tehniki uniwersitetinde guralan tomusky önümçilik tejribesine gatnaşýarlar. «Türkmenistan: Altyn asyr» neşiriniň habar bermegine görä, bu halkara okuw-tejribe maksatnamasy iki ýokary okuw mekdebiniň arasynda öň baglaşylan resmi hyzmatdaşlyk ylalaşygyna laýyklykda durmuşa geçirilýär. Tejribe toparyna okuwda we ylymda ýokary görkezijileri gazanan, daşary ýurt dillerini kämil bilýän hem-de programma üpjünçiligi boýunça öz dizaýn taslamalary bolan talyplar, şeýle hem institutyň tejribeli mugallymlary girizildi.

Sebitiň iň innowasion we döwrebap ylmy-barlag binýady bolan Kluž-Napoka tehniki uniwersiteti türkmen talyplaryna täze nesliň serwer, aragatnaşyk tor we robototehniki enjamlary bilen işlemäge doly şert döretdi. Ýaş hünärmenler tejribäniň çäklerinde maglumatlary gaýtadan işlemegiň intellektual programmalaryny, telekommunikasiýa ulgamlarynyň toplumlaýyn diagnostikasyny we kiberhowpsuzlyk maksatnamalaryny çuňňur özleşdirýärler. Okuwlaryň iň esasy aýratynlygy bolsa, talyplaryň Rumyniýada ýerleşýän dünýäniň «Bosch», «Emerson» we «Tenaris» ýaly ägirt uly tehnologiýa korporasiýalarynyň önümçilik merkezlerine göni baryp, iş ýüzünde tejribe toplap bilýändikleridir. Şonuň bilen birwagtda, türkmen wekiliýeti guralýan resmi duşuşyklarda Türkmenistanyň bilim we sanly ykdysadyýet ulgamyndaky gazanan üstünliklerini halkara jemgyýetçiligine yzygiderli tanyşdyrýarlar.