Türkmenistan Halkara Zähmet Guramasy (HZG) bilen hyzmatdaşlygyň ýol kartasynyň möhletini 2026-njy ýylyň ahyryna çenli uzaltmagy meýilleşdirýär. Bu barada sanly ulgam arkaly geçirilen Türkmenistanyň Ministrler Kabinetiniň mejlisinde wise-premýer, daşary işler ministri Raşid Meredow hasabat berdi.

Daşary syýasat edarasynyň ýolbaşçysynyň bellemegine görä, Türkmenistan HZG bilen halkara konwensiýalaryň çäginde iş alyp baryp, zähmet gatnaşyklarynda gatnaşýan ähli taraplaryň hukuklaryny goramak hem-de mynasyp iş şertlerini üpjün etmek ugrunda yzygiderli çäreleri durmuşa geçirýär. 2024–2025-nji ýyllar üçin niýetlenen hyzmatdaşlyk ýol kartasy Türkmenistanyň bu ugurda netijeli hyzmatdaşlyk tejribesini görkezdi.

Şunuň bilen baglylykda, Türkmenistanyň Daşary işler ministrligi hyzmatdaşlyk resminamasynyň 2026-njy ýylyň ahyryna çenli uzaldylmagyny we onuň durmuşa geçirilmegine döwlet edaralarynyň hem-de jemgyýetçilik guramalarynyň giňden çekilmegini teklip etdi.

Ýol kartasynda mejbury zähmeti, şol sanda çaga zähmetini öňüni almak boýunça syýasy-hukuk binýadyny berkitmek esasy ugurlaryň biri hökmünde kesgitlenýär. Şeýle hem Türkmenistanyň milli kanunçylygyny kämilleşdirmek we hukuk taýdan ähmiýetli çäreleriň ýerine ýetirilişini güýçlendirmek göz öňünde tutulýar.

Mundan başga-da, Türkmenistanda döwlet edaralary bilen kärdeşler arkalaşyklarynyň zähmet hukuklaryny goramak boýunça maksatly işleri güýçlendirilýär. Uly möçberli özgertmeleri goldamak maksady bilen degişli maglumatlary ýygnamak, hasaplamak we seljermek üçin ýörite maglumatlar binýadyny döretmek meýilleşdirilýär.

Şeýle hem HZG bilen Türkmenistanyň Hökümetiniň arasynda yzygiderli dialogy dowam etdirmek, şol sanda Türkmenistanyň Daşary işler ministrligi, Zähmet we ilatyň sosial gorag ministrligi, degişli edaralar hem-de HZG-niň bilermenleri bilen iki taraplaýyn duşuşyklary ulgamlaýyn esasda geçirmek meýilleşdirilýär.