Ol dünýäniň iň meşhur futbolçylarynyň biri. Hasaplarynda millionlar bar. Şertnamalary, kuboklary, dünýä derejesindäki şöhraty bar. Emma ol döwük ekranly telefon göterýär. Boş wagtyny bolsa… metjitde geçirýär.

Ýakyn wagtda Saud Arabystanynyň «Al-Nasr» topary Türkmenistanda “Arkadag” topary bilen duşuşar. Futbol ýyldyzlary bilen bilelikde bu ýere Sadio Mane hem gelip biler. Bu gün biz diňe bir futbolçy däl, eýsem Senegalyň Bambali obasynda, garyp musulman maşgalasynda dünýä inen hakyky ynsan barada gürrüň bereris.

Onuň kakasy ýerli metjitde imam bolupdyr. Onuň önüp ösen ýerlerinde futbol hünär däl-de, boş hyýal hasaplanylýardy. Sadio bolsa aýak ýalaňaç we ýyrtyk butsy bilen futbol oýnaýardy. Ol hatda futbolçy bolmak arzuwy üçin öýünden hem gaçypdy.

Häzirki wagtda Sadio Mane Çempionlar ligasynyň ýeňijisi, Afrika kubogynyň eýesi we dünýä futbolynyň ýyldyzy. Emma baýlyk onuň içki dünýäsini üýtgetmedi.

Sadio Mane yzygiderli namazyny berjaý edýär, Remezan aýynda oraza tutýar we futbol oýunlardan soň hem yzygiderli metjide barýar. Angliýada ony birnäçe gezek kamerasyz we goragsyz, hiç hili görkezme ýa-da reklama bolmazdan metjitde adaty arassaçylyk işlerini edip ýören mahaly görüpdirler.

Ol alkogol içmeýär, sada ýaşaýar we şeýle diýýär: «Halkym iň ýönekeý zatlara hem mätäçkä, maňa on awtoulagyň ýa-da altyn sagadyň näme peýdasy bar?»

Öz serişdeleri bilen Sadio Mane doglan obasynda hassahana, mekdep, stadion gurdy, kakasynyň imam bolup işlän metjidini abatlap berdi we sebitdäki iň garyp maşgalalara her aý maddy kömek berýär.

Ol şeýle diýýär: «Men açlygyň nämedigini bilýärin. Men muny başdan geçirdim. Eger şu gün men kömek edip bilýän bolsam — hakyky baýlyk şoldur». Sadio Mane beýik bolmagyň diňe meýdançada däl, eýsem durmuşda hem mümkindigini subut edýän futbolçydyr.