Tokio şäherinde «Merkezi Aziýa — Ýaponiýa» dialogynyň çäklerinde ilkinji gezek ýokary derejeli sammit geçirildi. Bu halkara duşuşyga Türkmenistanyň Prezidenti Serdar Berdimuhamedow gatnaşyp, Gazagystan, Gyrgyzystan, Täjigistan we Özbegistan döwletleriniň Baştutanlary bilen bilelikde Ýaponiýada iş saparynda boldy.

«Hotel New Otani Tokyo» myhmanhanasynda Merkezi Aziýa ýurtlarynyň döwlet Baştutanlary resmi taýdan garşylanylandan soňra, Ýaponiýanyň Premýer-ministri hanym Sanae Takaiçiniň ýolbaşçylygynda altytaraplaýyn ýokary derejeli duşuşyk geçirildi. Sammitiň dowamynda gatnaşyjy ýurtlaryň Liderleri öz garaýyşlaryny we tekliplerini beýan etdiler.

Türkmenistanyň Prezidenti çykyşynda ilkinji gezek şeýle derejede bir ýere jemlenmegiň ýurtlaryň arasynda uzak möhletleýin, durnukly we köptaraplaýyn hyzmatdaşlygy ösdürmäge bolan umumy islegiň aýdyň subutnamasydygyny belledi. Serdar Berdimuhamedow Türkmenistan bilen Ýaponiýanyň, şeýle hem Merkezi Aziýa ýurtlarynyň arasyndaky gatnaşyklaryň täze ugurlar we amaly mazmun bilen baýlaşdyrylmagynyň möhümdigini nygtady hem-de ykdysady we maýa goýum hyzmatdaşlygyna aýratyn ähmiýet berilýändigini aýtdy.

Döwlet Baştutany çykyşynda «ITOCHU», «Mitsubishi», «Kawasaki», «Sumitomo», «Toyo», «Sojitz», «Komatsu», «Toyota» ýaly öňdebaryjy ýapon kompaniýalary bilen Türkmenistanyň köp ýyllaryň dowamynda üstünlikli hyzmatdaşlyk edip gelýändigine ünsi çekdi. Şol bir wagtyň özünde, Merkezi Aziýa ýurtlarynyň Ýaponiýa bilen hyzmatdaşlygy has-da ösdürmek üçin uly mümkinçilikleriniň bardygy we bu ugurda ähli gatnaşyjylaryň güýçli taraplaryny herekete getirmegiň umumy wezipe bolup durýandygy bellenildi.

Serdar Berdimuhamedow «ýaşyl» ykdysadyýete geçişi, wodorod energetikasyny ösdürmegi, howa gün tertibini, üstaşyr ulag we logistika arabaglanyşygyny köptaraplaýyn hyzmatdaşlygyň ileri tutulýan ugurlary hökmünde görkezdi. Şeýle-de Türkmenistan adam mümkinçiliklerini ösdürmäge, bilim ulgamyndaky hyzmatdaşlyga, ýaşlara ýapon dilini öwretmäge aýratyn ähmiýet berýär.

Sammitiň dowamynda «Merkezi Aziýa — Ýaponiýa» formatynda hyzmatdaşlygy täze hil derejesine çykarmak, syýasy dialogy çuňlaşdyrmak, sebitara we işewürlik gatnaşyklaryny ösdürmek, şeýle hem ynsanperwer we intellektual alyşmalary giňeltmek bilen bagly möhüm meseleler ara alnyp maslahatlaşyldy.