Pekin şäherinde 13-nji martda Aşgabatda geçirilmegi meýilleşdirilýän Türkmen-Hytaý maýa goýum forumynyň tanyşdyrylyş çäresi geçirildi. Bu forumyň esasy çäreleri 28 — 30-njy aprel aralygynda Türkmenistanyň paýtagty Aşgabat şäherinde guralar.

Tanyşdyrylyş çäresi Daşary ýurtlarda telekeçiligi ösdürmek boýunça Hytaý assosiasiýasy tarapyndan Türkmenistanyň Hytaý Halk Respublikasyndaky ilçihanasynyň hem-de Türkmenistanyň Söwda-senagat edarasynyň goldaw bermeginde guraldy.

Çäräniň dowamynda gatnaşyjylara forumyň maksady we ähmiýeti barada giňişleýin maglumat berildi. Bellenilişi ýaly, bu forum Türkmenistan bilen Hytaýyň arasynda ykdysady hyzmatdaşlygy ösdürmek we täze maýa goýum mümkinçiliklerini ara alyp maslahatlaşmak üçin möhüm halkara meýdança bolar.

Türkmenistanyň Hytaýdaky ilçisi Parahat Durdyýew çykyşynda Türkmenistanyň maýa goýum mümkinçiliklerini giňden beýan etdi. Ol Türkmenistanyň makroykdysady görkezijileriniň durnuklylygyny aýratyn belläp, Türkmenistanda daşary ýurt maýadarlary üçin döredilen amatly şertler we ykdysady ýeňillikler barada maglumat berdi.

Türkmenistanyň Söwda-senagat edarasynyň wekilleri hem hyzmatdaşlygyň ileri tutulýan ugurlaryny görkezýän çykyşlary etdiler. Onda çig maly gaýtadan işlemek, eksport mümkinçiliklerini giňeltmek, ulag we logistika ulgamlaryny ösdürmek, şeýle hem Hytaýyň Türkmenistanyň üsti bilen geçýän halkara üstaşyr geçelgelerine gatnaşmagy ýaly ugurlar boýunça taslamalar hödürlendi.

Çäre göni gepleşikler sessiýasy bilen jemlendi. Onuň dowamynda hytaýly telekeçiler türkmen tarapy bilen hyzmatdaşlygyň mümkinçiliklerini ara alyp maslahatlaşyp, Türkmenistanda bilelikdäki maýa goýum taslamalaryny amala aşyrmagyň mümkinçiliklerini öwrendiler.