2026-njy ýylda Türkmenistanda geçirilmegi meýilleşdirilýän GDA-nyň Döwlet Baştutanlarynyň hem-de Hökümet Baştutanlarynyň geňeşleri Arkalaşygyň çäklerinde özara gatnaşyklaryň has-da ösdürilmegine möhüm täsir eder. Bu barada Türkmenistanyň daşary işler ministriniň orunbasary Mähri Bäşimowa Russiýa Federasiýasynyň Aşgabatdaky ilçihanasynda Diplomatik işgärleriniň güni mynasybetli geçirilen dabarada çykyş etdi.

Onuň bellemegine görä, häzirki ýylda Türkmenistan GDA-da başlyklyk edýär we şu ýagdaý bilen baglylykda birnäçe ähmiýetli çäreleri geçirmek göz öňünde tutulýar. Ýurdumyzda geçiriljek ýokary derejeli duşuşyklaryň köpugurly hyzmatdaşlygyň pugtalandyrylmagyna täze mümkinçilikleri açjakdygyna ynam bildirildi.

Diplomat çykyşynda Türkmenistan bilen Russiýanyň arasynda özara ynanyşmaga esaslanýan gatnaşyklaryň kemala gelendigini aýratyn nygtady. Şeýle gatnaşyklaryň döwletara hem-de halkara guramalarynyň çäklerinde hyzmatdaşlygy giňeltmäge şert döredýändigi bellenildi.

Şeýle hem iki ýurduň Liderleriniň arasynda dowam edýän netijeli şahsy dialogyň üstünlikleriň möhüm şerti bolup durýandygy aýdylýar. Ýokary derejedäki yzygiderli duşuşyklar dürli ugurlar boýunça bilelikdäki taslamalaryň işjeňleşmegine itergi berýär.

Çykyşynyň ahyrynda ministriň orunbasary Russiýanyň Aşgabatdaky diplomatik wekilhanasynyň işgärlerine alyp barýan işleriniň netijeliligi üçin hoşallyk sözlerini aýtdy.