2026-njy ýylda ABŞ-da, Kanadada we Meksikada geçiriljek Dünýä çempionatynyň öňüsyrasynda, FIFA oýnuň dinamikasyny ýokarlandyrmak we wagt ýitgisini azaltmak maksady bilen birnäçe täze düzgünleri synagdan geçirmegi meýilleşdirýär. Insaýder we žurnalist Gaston Edulyň habar bermegine görä, bu üýtgeşmeler futbol taryhynda iň täsirli reformalaryň biri bolup biler. Esasy üýtgeşmeler oýunçy çalşygyna, autlaryň girizilişine we eminler bilen gatnaşyga degişlidir.

Täze teklip edilýän düzgünlere görä, oýunçy çalşygy wagtynda meýdançany terk edýän futbolçy munuň üçin bary-ýogy 10 sekunt wagt sarplamaly. Eger oýunçy bellenen wagtda meýdançadan çykmasa, täze girýän oýunçy oýna goşulmak üçin bir minut garaşmaly bolar we şol wagt aralygynda topar bir oýunçy azlykda galmaly bolar. Şeýle hem, topy autdan oýna girizmek we derwezeden urgy urmak üçin berilýän wagt 5 sekunda çenli azaldylar. Bu möhlet bozulsa, topa eýelik etmek hukugy derrew garşydaş topara berler.

VAR (Wideo kömekçi emin) ulgamynyň ygtyýarlyklaryny giňeltmek hem gün tertibinde duran meseleleriň biridir. Mundan beýläk VAR diňe göni gyzyl kartlara däl, eýsem meýdançadan kowulmaga sebäp bolýan ikinji sary duýduryşlara we ýalňyş berlen burçdan urgulara hem seredip biler. Mundan başga-da, eminler bilen diňe toparyň kapitanynyň gepleşip biljekdigi baradaky düzgün has-da berkidiler. Beýleki oýunçylar emine düşündiriş sorap ýüz tutan ýagdaýynda haýal etmän sary kart bilen jezalandyrylar.

Futbol janköýerleri üçin ýene bir möhüm habar: FIFA 1-nji aprelde bilet satuwynyň soňky tapgyrynyň başlanýandygyny yglan etdi. Oýunlar 11-nji iýun – 19-njy iýul aralygynda geçiriler we biletlere bolan isleg häzirden örän ýokarydyr. Eýýäm bir milliondan gowrak bilet satylan hem bolsa, FIFA-nyň baha syýasaty halkara muşdak guramalary tarapyndan tankyt edilýär. Dünýäniň iň uly futbol forumy diňe bir täze düzgünleri bilen däl, eýsem rekord derejedäki gatnaşyjylary we täze formaty bilen hem futbol taryhyna gorer.