2025-nji ýylyň 22-nji sentýabrynda Türkmenistanyň Daşary işler ministriniň orunbasary Ahmet Gurbanow bilen Hytaýyň Hangjou şäher häkimliginiň Baş sekretarynyň orunbasary Sýu Çinşan duşuşyk geçirdiler.

Duşuşykda iki ýurduň strategik gatnaşyklarynyň giňeldilmegi bilen baglanyşykly ugurlar ara alnyp maslahatlaşyldy. Taraplar ýokary derejeli gatnaşyklaryň dowamlylygy netijeli hyzmatdaşlygyň binýadydygyny nygtadylar.

Söhbetdeşlikde sebit we medeni hyzmatdaşlygyň mümkinçilikleri, şeýle-de ýokary tehnologiýalar, emeli intellekt we şäher dolandyryşynyň sanlylaşdyrylmagy bilen bagly taslamalar üns merkezinde boldy. Aýratynam "akylly şäherler" konsepsiýasy we şäher infrastrukturasynyň döwrebaplaşdyrylmagy aýratyn bellenildi.

Türkmen tarapy Hangjou Dýansi uniwersiteti bilen Türkmenistanyň öňdebaryjy ýokary okuw mekdepleriniň arasynda ylym-bilim hyzmatdaşlygyny işjeňleşdirmegi teklip etdi.

Şeýle hem, Arkadag şäheriniň halkara derejesinde ykrar edilendigi aýratyn bellenildi. 2025-nji ýylyň mart aýynda şäher Hangjou Dýansi uniwersiteti tarapyndan ekologiýa taýdan arassa we döwrebap şäher hökmünde "Kämillik şahadatnamasy" bilen sylaglandy.

Taraplar sport ugurlaryndaky gatnaşyklary ösdürmek arkaly halklaryň arasynda dostlugy has-da pugtalandyrmagyň mümkinçiliklerine hem seretdiler.