Şu ýylyň 24-nji iýunynda Hytaý Halk Respublikasynyň Uhan şäherinde «Hubeý – açyklygyň içerki merkezi we strategik öwrülme» diýen simwoliki at bilen giň gerimli tanyşlyk sapary guraldy. Çäräniň çäklerinde Hubeý welaýat komitetiniň sekretary Guan Çžio sebite gelen diplomatik wekilhanalaryň ýolbaşçylary we Şanhaý Hyzmatdaşlyk Guramasy (ŞHG) ýaly öňdebaryjy halkara guramalaryň ekspertleri bilen resmi duşuşyk geçirdi. Türkmenistanyň Daşary işler ministrliginiň habar bermegine görä, bu möhüm duşuşykda HHR-de akkreditirlenen 27 sany daşary ýurt döwletiniň hem-de halkara guramalaryň ilçileriniň we ýokary wezipeli diplomatlarynyň adyndan Türkmenistanyň Hytaýdaky Adatdan daşary we Doly ygtyýarly ilçisi Parahat Durdyýew umumy çykyş etdi.

Türkmen diplomatik wekilhanasynyň ýolbaşçysy öz çykyşynda tutuş halkara wekiliýetiň adyndan Hubeý welaýatynyň ýolbaşçylaryna, Hytaýyň «Sinhua» döwlet habarlar agentliginiň institutyna we ähli guramaçylara tanyşlyk saparynyň ýokary derejede guralandygy üçin çuňňur minnetdarlyk bildirdi. Ilçi P.Durdyýew şu ýylda ýokary döwlet derejesinde geçirilen gepleşikleriň netijesinde täze badalga alan Hytaý we daşary ýurtlar ortasyndaky döwletara gatnaşyklaryň ýokary depginine aýratyn ünsi çekdi. Şeýle hem ikitaraplaýyn we köptaraplaýyn hyzmatdaşlygy diwersifikassiyalaşdyrmak nukdaýnazaryndan innowasion kuwwata eýe bolan Hubeý welaýatynyň strategik orunlaryň birini eýeleýändigi bellenip geçildi.

Resmi duşuşygyň ahyrynda Türkmenistanyň ilçisi dünýä diplomatlarynyň adyndan sebitiň ägirt uly ykdysady we tehnologik mümkinçiliklerini jikme-jik öwrenmäge döredilen şertler üçin ýene-de bir gezek tüýs ýürekden minnetdarlyk bildirdi. Ol guralan bu saparyň döwletleriň arasyndaky dostlukly we hyzmatdaşlyk gatnaşyklarynyň mundan beýläk-de rowaçlanmagyna hem-de täze sepgitlerde berkemegine kuwwatly itergi berjekdigini ynamly belledi.