Türkmenistanyň Prezidenti Serdar Berdimuhamedow Hindistan Respublikasynyň Prezidenti hanym Draupadi Murmuwa ýurduň esasy döwlet baýramy — Respublika güni mynasybetli mähirli gutlaglaryny we hoşniýetli arzuwlaryny iberdi. Bu barada Türkmenistanyň resmi habar çeşmeleri maglumat berýär.

Döwlet Baştutany gutlagynda Türkmenistan bilen Hindistan Respublikasynyň arasynda ýyllaryň dowamynda emele gelen dostlukly we özara hormata esaslanýan gatnaşyklaryň aýratyn ähmiýetini nygtady. Prezident Serdar Berdimuhamedow bu hyzmatdaşlygyň geljekde hem Türkmenistan we Hindistan üçin möhüm ugurlarda işjeň ösdüriljekdigine, iki ýurduň halklarynyň umumy bähbitlerine hyzmat etjekdigine berk ynam bildirdi.

Şeýle hem Türkmenistanyň Prezidenti mümkinçilikden peýdalanyp, Prezident Draupadi Murmuwa berk jan saglyk, üstünlikli döwlet işini, Hindistanyň halkyna bolsa parahatçylyk, durnukly ösüş we abadançylyk arzuw etdi. Türkmenistan Hindistan bilen dostlukly gatnaşyklary giňeltmegi möhüm ugur hökmünde görýär.