Türkmenistanda oba hojalyk pudagyny ösdürmek boýunça alnyp barylýan işler täze tapgyra çykýar. Balkan we Mary welaýatlarynda gök önümleri ösdürip ýetişdirmäge niýetlenen häzirki zaman ýyladyşhana toplumlarynyň açylyş dabaralary geçirildi. Bu barada Türkmenistanyň resmi habar beriş serişdeleri habar berdi.

Balkan welaýatynyň Bereket etrabynda, Türkmenistanyň Senagatçylar we telekeçiler birleşmesiniň agzasy bolan «Nurly meýdan» daýhan hojalygynyň önümçilik düzüminiň çäginde täze ýyladyşhana işe girizildi. Bu desga daşary ýurtlaryň öňdebaryjy kompaniýalarynyň öndürýän enjamlary bilen üpjün edilip, ähli önümçilik prosesleri sanly tehnologiýalaryň esasynda alnyp barylýar. Ýyladyş, çyglylyk we suwaryş ulgamlary doly awtomatlaşdyrylyp, Türkmenistanyň howa şertlerine laýyklykda sazlanýar.

Ýyladyşhananyň ekerançylyk meýdany 10 gektara deň bolup, umumy tutýan meýdany 13,6 gektara barabar. Taslama 150-den gowrak täze iş ornuny döretmäge mümkinçilik berdi. Ýyllyk önümçilik kuwwaty 2 müň tonna bolan bu ýyladyşhanada pomidor ýygnamak işleri geljek ýylyň tomusyna çenli dowam eder.

Mary welaýatynyň Mary etrabynda ýerleşýän «Eziz dag» hojalyk jemgyýetine degişli bolan başga bir döwrebap ýyladyşhana hem ulanyşa berildi. Ýyllyk kuwwaty 2 müň tonna bolan bu desga Türkmenistanyň Senagatçylar we telekeçiler birleşmesiniň gurluşykçylary tarapyndan bina edildi. Ýyladyş, suwaryş we howa dolandyryş ulgamlary kompýuter arkaly doly dolandyrylýar.

Umumy meýdany 12 gektara barabar bolan ýyladyşhanada pomidoryň 9 görnüşi ösdürilip ýetişdirilýär. Her bir ösümlige aýratyn ideg edilip, degişli agrotehniki çäreler ýerine ýetirilýär. Şeýle taslamalar Türkmenistanyň oba hojalyk ulgamynyň döwrebaplaşdyrylýandygynyň aýdyň mysalydyr.