Türkmen dizaýneri Leýli Haýydowa durnukly moda dünýäsinde möhüm waka öwrüljek «Green Runway Fashion Show» atly ilkinji halkara ekologiki moda görkezilişine gatnaşar. 23-nji aprelde Astanada geçiriljek bu çäre «RES 2026 EXPO» atly halkara ekologiýa tehnologiýalary sergisiniň çäklerinde guralýar. Taslamanyň esasy maksady döredijilik wekilleleriniň we ekologlaryň tagallalaryny birleşdirip, tebigaty goramak hem-de serişdeleri tygşytly ulanmak baradaky düşünjeleri wagyz etmekden ybaratdyr.

Moda görkezilişi Merkezi Aziýanyň we Azerbaýjanyň iň tanalýan dizaýnerlerini bir ýere jemlär. Türkmenistanyň wekili bilen bir hatarda, Gyrgyzystandan Tatýana Worotnikowa, Azerbaýjandan Gülnara Halilowa, Özbegistandan Ýelena Ladik ýaly ussatlar öz işlerini hödürlärler. Her bir gatnaşyjy üç sany esasy ugur boýunça 10–12 lybasdan ybarat toplumy taýýarlar: «Eco-Heritage» (milli miras we tebigy matalar), «Upcycling & Recycling» (gaýtadan işlenen materiallar) we «Bio-Design» (tebigy nagyşlar we biodürlülik).

Leýli Haýydowanyň toplumynda «apsaýkling» tehnikasyna, ýagny ulanylan materiallara täze durmuş bermek arkaly döredilen ýokary hilli egin-eşiklere aýratyn orun berler. Şeýle hem, «Bio-Design» ugry arkaly dizaýnerler seýrek duş gelýän ösümlikleriň we «Gyzyl kitaba» giren görnüşleriň keşplerini janlandyryp, ekologiýa meselelerine ünsi çekerler. Sahna bezegi üçin janly ösümlikleriň ulanylmagy görkezilişiň «janly giňişlik» täsirini has-da güýçlendirer.

Bu çäräniň guralýan meýdançasy bolan «RES 2026 EXPO» sergisi Gazagystanyň Prezidenti Kasym-Žomart Tokaýewiň BMG-niň Baş Assambleýasynyň 78-nji mejlisinde öňe süren başlangyjy esasynda amala aşyrylýar. 22–24-nji aprel aralygynda geçiriljek sergä dünýäniň 30 ýurdundan 300-e golaý kompaniýanyň gatnaşmagyna garaşylýar. Türkmen dizaýneriniň şeýle uly göwrümli çärä gatnaşmagy ýurdumyzyň halkara ekologiýa maksatnamalaryna ygrarlydygyny we dizaýn ulgamyny döwrebap ýörelgeler esasynda ösdürýändigini görkezýär.