Halkara alymlar topary häzirki zaman Awstraliýa aborigenleriniň we papuaslaryň ata-babalarynyň takmynan 60 000 ýyl mundan ozal Günorta-Gündogar Aziýadan iki aýratyn göçüş ýoly arkaly gadymy Sahul yklymyna gelendigini anykladylar.

Bu barlag Science Advances žurnalynyň sahypasynda çap edildi we Haddersfild hem Sautgempton uniwersitetleriniň hünärmenleri tarapyndan amala aşyryldy. Oňa görä, Homo sapiens-iň Okeaniýada irki ornaşyşyň wagty takyk kesgitlenipdir.

Alymlar häzirki zaman Awstraliýa aborigenlerinden, Täze Gwineýalylardan we Günorta-Gündogar Aziýanyň we Ýuwaş ummanynyň günbatar ekwatorial-tropiki ilatyndan alnan 2 500 töweregi mitohondrial genomlary öwrediler. Ene liniýasy boýunça geçýän DNK olara genealogiki baglanyşyklary dikeltmäge we iň gadymy nesilleri kesgitlemäge mümkinçilik berdi.

Netijeler Awstraliýa we Täze Gwineýa mahsus genetik nesilleriň takmynan 60 000 ýyl mundan ozal emele gelendigini görkezdi. Birinji nesil demirgazyk ýollardan (Demirgazyk Indoneziýa we Filippinler) geçip, bütin Sahul boýunça ýaýrapdyr; ikinjisi has günorta ýol bilen diňe geljekki Awstraliýa ýerlerine barypdyr. Şol döwürde deňiz derejesi pes bolup, Awstraliýa bilen Täze Gwineýa birleşen gury ýer massiwini emele getiripdir. Şeýle-de bolsa aralykdaky bogazlary geçmek üçin ösen deňizçilik başarnyklary gerek bolupdyr.

«Biziň açyşymyz adamyň gelip çykyşyny we ewolýusiýasyny, deňiz üsti bilen göçüşleriň aýratynlyklaryny we gadymy navigasiýa başarnyklaryny anyklamaga kömek edýär. Bu bolsa sebitdäki ýerli jemgyýetleriň irki syýahatlar bilen baglanyşykly çuňňur mirasyny görkezýär» diýip, deňiz arheology, Sautgempton uniwersitetiniň professory Helen Farr belledi.