Magtymguly adyndaky Türkmen döwlet uniwersitetiniň hukuk fakultetiniň talyby Guwançmyrat Arrykow halkara derejesindäki ylmy-barlag bäsleşiginiň ýeňijisi boldy. Ýurdumyzyň iň abraýly ýokary okuw mekdepleriniň birinde bilim alýan 3-nji ýyl talyby özüniň ylmy işi bilen halkara eminleriniň ünsüni çekmegi başardy. Bäsleşigiň netijelerine görä, ol 1-nji derejeli diplom bilen sylaglandy.

Halkara bäsleşik Russiýa Federasiýasynyň Ufa şäherinde ýerleşýän «Eterna» ylmy-neşirýat merkezi tarapyndan guraldy. Onlaýn formatda geçirilen bu çäre ylmy meseleleri seljermek, modelleşdirmek we olary tejribede ulanmak ýaly möhüm ugurlara bagyşlandy. Ylmy forumyň esasy maksady ýaş alymlaryň we talyplaryň gözleglerini höweslendirmekden ybarat boldy.

Türkmen talyby bäsleşikde halkara hukugynyň düýpli ýörelgeleriniň ýuridiki aýratynlyklaryna bagyşlanan makalasy bilen çykyş etdi. Bu ylmy derňewde häzirki zaman dünýä düzgünleriniň kanunçylyk binýady we olaryň amaly ähmiýeti baradaky meseleler düýpli seljerildi. G. Arrykowyň bu işine uniwersitetiň konstitusiýa hukugy kafedrasynyň müdiri S. Goçumowa ylmy ýolbaşçylyk etdi.

Bu üstünlik ýurdumyzyň bilim ulgamynda gazanylýan halkara hyzmatdaşlygyň we ýaş hünärmenleriň ylmy derejesiniň ýokarlanýandygynyň nobatdaky subutnamasydyr. Sanly tehnologiýalaryň mümkinçiliklerinden peýdalanyp, türkmen talyplary halkara sahnasynda täze hünär belentliklerini eýelemegi dowam etdirýärler.