Tähranda Garaşsyz Döwletleriň Arkalaşygyna agza ýurtlaryň wekilleri bilen Eýranyň erkin söwda, senagat we ýörite ykdysady zolaklar boýunça ýolbaşçylarynyň arasynda iş duşuşygy geçirildi. Duşuşyk sebitde köptaraplaýyn ykdysady hyzmatdaşlygy ösdürmek we işewürlik gatnaşyklaryny işjeňleşdirmek boýunça anyk ädimleri kesgitlemäge bagyşlandy.

Taraplar erkin ykdysady zolaklaryň çäginde hyzmatdaşlygyň mümkinçiliklerini giňişleýin seljerdiler. Serhetüsti ýük daşamalarynyň möçberini artdyrmak, şeýle hem syýahatçylyk alyş-çalşygyny ösdürmek meseleleri ara alnyp maslahatlaşyldy. Bu başlangyçlaryň GDA ýurtlarynyň, şol sanda Türkmenistanyň, hem-de Eýranyň ykdysady hyzmatdaşlygyny has-da pugtalandyrmagyna garaşylýar.

Maslahatyň dowamynda Türkmenistan bilen Eýranyň arasyndaky bilelikdäki taslamalara aýratyn üns berildi. «Sarahs — Sarahs» we «Altyn asyr — Inçe-burun» serhet geçelgelerinde ýöriteleşdirilen söwda zolaklaryny döretmek baradaky teklipler seljerildi. Bu taslamalaryň durmuşa geçirilmegi serhetýaka söwdasyny ýeňilleşdirip, Türkmenistanyň üstaşyr mümkinçiliklerini has netijeli peýdalanmaga şert döreder.