Türkmenistanyň Daşary işler ministrliginde halkara guramalarynyň wekillerini «Türkmenistanyň Bitaraplygynyň 30 ýyllygy» mynasybetli döredilen ýubileý medaly bilen sylaglamak dabarasy geçirildi. Bu barada resmi çeşmelerde habar berildi.

Ministrler Kabinetiniň Başlygynyň orunbasary, daşary işler ministri Raşid Meredow Türkmenistanyň Prezidentiniň daşary ýurt raýatlaryny sylaglamak baradaky Permanyny okap, degişli medallary we ýadygärlik kümüş nyşanlary dabaraly ýagdaýda gowşurdy.

Sylaga mynasyp bolanlaryň hatarynda BMG-niň Türkmenistandaky hemişelik utgaşdyryjysy Dmitriý Şlapaçenko hem-de BMG-niň Ösüş maksatnamasynyň Türkmenistandaky hemişelik wekili Narine Saakýan bar.

Çykyşynda ministr Türkmenistanyň hemişelik Bitaraplyk ýörelgesiniň yzygiderli alnyp barylýan diplomatik işleriň netijesinde halkara giňişlikde giňden ykrar edilendigini belledi.

Şeýle-de daşary ýurt hyzmatdaşlarynyň Türkmenistanyň Garaşsyzlygyny we Bitaraplyk hukuk derejesini pugtalandyrmakda, halkara gatnaşyklary ösdürmekde hem-de dünýäde parahatçylyk we ynanyşmak ýörelgelerini ilerletmekde möhüm goşant goşýandyklary aýratyn nygtaldy.