«Talwas Ýoly» ýapyk görnüşli paýdarlar jemgyýeti we «Oguz Forum & Expo» bölümi Türkmenistanyň Logistika Assosiasiýasy bilen hyzmatdaşlyk etmek boýunça resmi ylalaşyk gazandy. Bu hyzmatdaşlygyň çäklerinde 2026-njy ýylyň 28–30-njy apreli aralygynda Türkmen-Hytaý biznes forumy we sergisi geçiriler.

 

Baglaşylan şertnama forumyň we serginiň ýokary derejede guralmagyny üpjün etmäge, şeýle hem logistika, ulag, eksport-import ugurlarynda iki ýurduň arasynda hyzmatdaşlygy giňeltmäge gönükdirilendir. «Talwas Ýoly» ÝGPJ we «Oguz Forum & Expo» çäräniň resmi guramaçylary hökmünde çykyş edip, işewürlik maksatnamasynyň taýýarlanylmagy, sergi ekspozisiýasynyň guralmagy, B2B we B2G duşuşyklarynyň geçirilmegi hem-de Türkmenistanyň we Hytaý Halk Respublikasynyň işewür toparlarynyň gatnaşygyny utgaşdyrar.

 

Bu halkara çäre Türkmenistanyň we Hytaýyň arasynda söwda-ykdysady hyzmatdaşlygy giňeltmek, logistika we ulag ulgamlarynda hyzmatdaşlygy ösdürmek, kompaniýalaryň arasynda göni işewür gatnaşyklary ýola goýmak hem-de ýurdumyzyň eksport we maýa goýum mümkinçiliklerini tanyşdyrmak üçin möhüm meýdança bolar.

 

Türkmenistanyň Logistika Assosiasiýasy bilen hyzmatdaşlygyň çäklerinde onuň agzalary üçin ýörite şertler döredilýär. Assosiasiýanyň agzalary Türkmen-Hytaý biznes forumyna we sergisine gatnaşmak üçin 10 göterim arzanladyşdan peýdalanyp bilerler. Bu başlangyç logistika kompaniýalaryny goldamaga, olaryň halkara derejesindäki ornuny giňeltmäge hem-de Türkmenistanyň sebitde möhüm ulag-logistika merkezi hökmündäki roluny pugtalandyrmaga gönükdirilendir.

 

Türkmen-Hytaý biznes forumy 2026 baglaşylan hyzmatdaşlyk ylalaşyklarynyň netijesinde halkara işewür hyzmatdaşlygy ösdürmegiň möhüm tapgyry bolar.