Hindistan Respublikasy bilen Türkmenistan sebitde parahatçylygy goramak we durnukly ösüşi üpjün etmek meselelerinde umumy gyzyklanma eýeleýär. Bu barada Hindistanyň Türkmenistandaky Adatdan daşary we Doly ygtyýarly ilçisi Bandaru Wilsonbabu Hindistan Respublikasynyň milli baýramy mynasybetli geçirilen resmi kabul edişlikde eden çykyşynda aýtdy.

Diplomatyň bellemegine görä, soňky ýyllarda Türkmenistan bilen Hindistanyň arasyndaky hyzmatdaşlyk täze derejä çykdy. Iki döwlet Birleşen Milletler Guramasynyň çäklerinde, şeýle hem «Hindistan – Merkezi Aziýa» hyzmatdaşlyk platformasynyň esasynda yzygiderli dialogy dowam etdirýär. Ilçi Hindistan bilen Türkmenistanyň terrorçylyk, ekstremizm, radikallaşma, neşe serişdeleriniň bikanun dolanyşygy we kiberjenaýatçylyk ýaly häzirki zaman howplaryna garşy bilelikde hereket etmäge gyzyklanma bildirýändigini nygtady.

Bandaru Wilsonbabu Hindistanyň parahatçylykly ýörelgeleri goldaýandygyny, şol bir wagtyň özünde bolsa öz raýatlarynyň howpsuzlygyny üpjün etmek maksady bilen terrorçylykly howplara garşy anyk we tutanýerli çäreleri görmäge taýýardygyny aýtdy. Şeýle-de ol bu ugurda Hindistana bildirilen goldaw üçin Türkmenistanyň hökümetine we halkyna minnetdarlyk bildirdi.

Ilçi çykyşynyň dowamynda Hindistanyň toplan tejribesini Türkmenistan bilen paýlaşmagy dowam etdirjekdigini belläp, goranyş we howpsuzlyk, energetika, saglygy goraýyş, derman senagaty hem-de sanly infrastruktura ýaly ugurlarda Türkmenistan bilen hyzmatdaşlygyň giňeldiljekdigini aýtdy.