Oktýabr aýynyň 3-ne Aşgabatda “Ozon we klimat” atly ylmy we döredijilik bäsleşiginiň jemleýji tapgyry geçirildi. Bu çäre “Ýaş tebigatçy” jemgyýetçilik guramasy tarapyndan, BMG-niň Senagat ösüşi boýunça guramasy (UNIDO) we BMG-niň Ösüş Maksatnamasy (BMGÖM) bilen bilelikde gurnaldy. Bäsleşik Ozon gatlagyny goramagyň Halkara güni mynasybetli geçirildi.

Bäsleşigiň maksady ýaşlaryň ekologiýa bilen baglanyşykly düşünjelerini çuňlaşdyrmak, döredijilik we ylmy-barlag ukyplaryny ösdürmek, şeýle hem howanyň üýtgemegi ýaly wajyp meselelerde pikirlenmäge höweslendirmekden ybarat boldy.

Bäsleşige paýtagtymyzyň orta mekdepleriniň 7–12-nji synp okuwçylary gatnaşdylar. Olar ozon gatlagyny goramak we klimat üýtgemesiniň täsirlerini azaltmak bilen baglanyşykly taslamalaryny we maketlerini hödürlediler.

Netijeler şeýle boldy:

• 1-nji orun: Aşgabatdaky 55-nji orta mekdebiň okuwçylary – Hallyberdiýew Ybraýym, Akgaýewa Akgül, Ataýewa Aýşa we Demidowskiý Stanislaw.

• 2-nji orun: 15-nji orta mekdepden Ahmedow Ahmet we Agamyradow Alyhan.

• 3-nji orun: 34-nji orta mekdebiň okuwçysy Durdyýewa Gülnur.

“Ýaş tebigatçy” guramasynyň halkara gatnaşyklara jogapkär hünärmeni Merjen Akyýewa bäsleşik barada şeýle diýdi:

“Ýaşlaryň ekologiýa temalaryna bolan gyzyklanmasy guwandyryjy. Olar innowasion pikirler bilen çykyş etdiler we möhüm meselelerde döredijilikli çemeleşmeleri görkezmegi başardylar.”

Ýeňijilere ýadygärlik sowgatlar we Hormat hatlary gowşuryldy. Gatnaşanlaryň ählisine bolsa degişli şahadatnamalar berildi.