Magtymguly adyndaky Türkmen döwlet uniwersitetiniň talyplary halkara giňişlikde geçirilýän abraýly bäsleşiklerde üstünlikli çykyş edip, baýrakly orunlara eýe boldular. Türkmenistanyň ýokary bilim ulgamynyň wekilleri bolan ýaşlar özleriniň bilim we ylmy taýýarlygynyň ýokary derejesini ýene-de bir gezek subut etdiler.

Uniwersitetiň italýan dili we edebiýaty hünäriniň II ýyl talyby Aýlar Arazberdiýewa Gazagystanyň “Bilim-örkenieti” milli innowasiýa ylmy-barlag merkezi hem-de “Žana Gazagystan” respublikan innowasion merkezi tarapyndan guralan “GDA-nyň iň gowy talyby” atly halkara bäsleşigine onlaýn görnüşde gatnaşdy. Ol GDA ýurtlarynda ýaşlar syýasatynyň ösüşine goşan şahsy goşandy üçin ýeňiji diýlip yglan edildi. Netijede, A.Arazberdiýewa I derejeli diplom, ýörite döşe dakylýan nyşan hem-de kubok bilen sylaglandy. Bu üstünlik Türkmenistanyň bilim ulgamynyň halkara derejesinde tanalýandygyny görkezýär.

Şeýle-de, hukuk öwreniş hünäriniň IV ýyl talyby Nurýagdy Baýryýew Russiýa Federasiýasynyň Penza şäherinde ýerleşýän “Ylym we magaryf ylmy hyzmatdaşlyk boýunça halkara merkezi” tarapyndan geçirilen “Iň gowy ylmy iş – 2025” atly XXIII Halkara ylmy-barlag bäsleşigine gatnaşdy. Ol “Hukuk ylymlary” ugry boýunça “Türkmenistanyň milli howpsuzlygynyň hukuk esaslary we ony üpjün etmegiň aýratynlyklary” atly ylmy işi bilen çykyş edip, II derejeli diploma mynasyp boldy. Ylmy işi Konstitusiýa hukugy kafedrasynyň uly mugallymy, hukuk ylymlarynyň kandidaty O. Suhanberdiýewanyň ýolbaşçylygynda taýýarlanyldy.

Bu üstünlikler Magtymguly adyndaky Türkmen döwlet uniwersitetiniň talyplarynyň Türkmenistanyň halkara bilim we ylmy giňişliginde eýeleýän ornuny has-da berkitýändigini görkezýär.