Sandia Milli laboratoriýalarynyň (ABŞ) alymlary reňkli we ýokary takyklykly rentgen şekillerini döretmäge mümkinçilik berýän täze usuly ornaşdyrdylar. Bu innowasion tehnologiýa lukmançylykdan başlap senagat barlaglaryna çenli köp ugurlarda uly ähmiýete eýe bolup biler.

Taslamanyň ýolbaşçysy Edwart Himenes täze tehnologiýanyň adynyň köp metallik nyşanalaryň ulanylmagy bilen reňkli giperspektral rentgen wizualizasiýasy diýlip atlandyrylýandygyny aýtdy. Bu usul dürli metallaryň dürli energiýaly — ýagny dürli "reňkli" — rentgen şöhlelerini döretmek aýratynlygyna esaslanýar.

Has takyk we aýdyň şekilleri almak üçin alymlar rentgen şöhleleriniň fokus nokadyny kiçeltmek maksady bilen woltfram, altyn, molibden, samarý we kümüş ýaly metallardan örän ownuk nokatlar bilen taýýarlanan anodlary ulandylar. Bu metallaryň hersi şöhleleri dürli energiýada berip, dürli maglumatlary almaga mümkinçilik berýär.

Fotoonlary energiýasyna görä tapawutlandyrýan ýörite detektor arkaly rentgen şöhleleriniň her bir bölegi seljerilýär. Şeýlelikde, materialyň düzümindäki elementleriň dykyzlygyny we görnüşini takyk kesgitlemek mümkin bolýar. Netijede bolsa reňkli, ýokary anyklykly we maglumat taýdan baý şekiller alynýar.

Alymlaryň pikiriçe, bu tehnologiýa howpsuzlyk barlaglarynda, önümçiligiň hiline gözegçilikde, materiallary dargatmazdan barlamakda we lukmançylyk diagnozynda giňden ulanylyp bilner.