2025-nji ýylyň 9-14-nji sentýabry aralygynda Ahal welaýatynyň häkimliginiň goldawynda Türkmenistanyň Körler we kerler jemgyýeti üçin däp bolan «Sungat we şygryýet» festiwaly geçirildi.
Bu medeni çärä Aşgabatdan we welaýatlardan gelen takmynan 110 adam gatnaşdy. Gözi we gulagy çäkli gatnaşyjylar alty günläp dürli konsert çykyşlaryny görkezdi.
Jemgyýet bu görnüşdäki döredijilik festiwallaryny 2000-nji ýyllardan bäri yzygiderli geçirýär. Onuň döredijilik toparlary ýurdumyzyň ähli künjeklerinde hereket edýär we uly hormata eýe. 2024-nji ýylda bolsa olar «Awaza» milli syýahatçylyk zolagynda çykyş etdiler.
Festiwal gatnaşyjylara Watana, halkymyza we milli däp-dessurlarymyza bolan söýgüsini sungatyň we şygryýetiň üsti bilen beýan etmäge mümkinçilik berdi.
Çäräniň ýokary guramaçylyk derejesi Ahal welaýat häkimliginiň, jemgyýetçilik guramalarynyň, şol sanda Türkmenistanyň Gyzyl Ýarymaý jemgyýetiniň hem-de dürli edaralaryň işgärleriniň goldawy bilen üpjün edildi.
Festiwalyň gatnaşyjylary çäräniň täsirli we ýatda galyjy bolandygyny aýdyp, minnetdarlyk bildirdiler.