2025-nji ýylda Türkmenistanyň Prezidenti Serdar Berdimuhamedow dürli derejedäki on bäş daşary ýurt saparyny amala aşyrdy. Bu barada Türkmenistanyň Daşary işler ministri Raşid Meredow «Halkara parahatçylyk we ynam ýyly: bitarap Türkmenistanyň aýgytly ädimleri» atly maslahatda çykyş edip habar berdi.

Daşary syýasat edarasynyň ýolbaşçysy öz çykyşynda 2025-nji ýylyň Türkmenistanyň häzirki taryhynda aýratyn orun eýeländigini nygtady. Onuň sözlerine görä, bu ýyl Türkmenistanyň döwletliligini pugtalandyrmakda, syýasy durnuklylygyny berkitmekde, ykdysady we durmuş ösüşini üpjün etmekde möhüm tapgyr boldy.

Ýylyň dowamynda Türkmenistanyň çäginde hem-de daşary ýurtlarda Parahatçylyk we ynam ýylyna bagyşlanan köp sanly halkara çäreler geçirildi. Türkmenistan ikitaraplaýyn hyzmatdaşlygy yzygiderli ösdürip, ýokary derejedäki gatnaşyklara aýratyn üns berdi.

Şeýle-de ministr Milli Lideriň ýylyň dowamynda dokuz döwlete sapar edendigini aýtdy. Munuň bilen bir hatarda, 2025-nji ýylda Türkmenistana dünýäniň dürli ýurtlarynyň döwlet we hökümet Baştutanlarynyň otuz bir sapary guraldy.

Raşid Meredowyň bellemegine görä, bu görkeziji Türkmenistanyň işjeň daşary syýasat alyp barýandygyny we halkara hyzmatdaşlygyň esasy ýörelgelerini üstünlikli durmuşa geçirýändigini aýdyň görkezýär.