Türkmenistanyň Prezidenti Serdar Berdimuhamedow Aşgabatda geçirilen Halkara parahatçylyk we ynanyşmak forumynda çykyş edip, Birleşen Milletler Guramasy bilen hyzmatdaşlykda Parahatçylyk we Bitaraplyk uniwersitetini döretmek baradaky başlangyjy öňe sürdi. Bu teklip bitaraplygyň amaly mümkinçiliklerini ösdürmäge, şeýle hem ylmy-barlag we bilim ugurlarynda ulgamlaýyn işleri alyp barmaga gönükdirilendir.

Döwlet Baştutanynyň bellemegine görä, täze uniwersitet BMG-niň parahatçylygy berkitmek boýunça toplan baý tejribesine daýanar, öňüni alyş diplomatiýasynyň syýasy-diplomatik gurallaryny giňden ulanmak üçin netijeli meýdança bolup hyzmat eder. Şeýle hem bu bilim merkeziniň döredilmegi bitaraplygyň mazmunyny has-da baýlaşdyrmaga we onuň ylmy taýdan öwrenilmegine mümkinçilik berer.

Serdar Berdimuhamedow bu başlangyja halkara hyzmatdaşlaryň goldaw bildirjekdigine umyt edýändigini aýdyp, taslamanyň mazmuny we guramaçylyk taraplary boýunça anyk maslahatlaşmalara açykdygyny belledi.

Şeýle-de Prezident Türkmenistanyň bitaraplyk syýasatyna esaslanýan daşary syýasatynyň konstruktiw, özara bähbitli we dostlukly halkara gatnaşyklary ösdürmäge hyzmat edýändigini, bu tejribäniň bitaraplygyň dünýäniň dürli sebitlerinde giňden ulanylmagy üçin uly mümkinçilikleriň bardygyny görkezýändigini nygtady.