Oýun sanawy
Türkmenistanyň Futbol federasiýasy ýurduň sport ýokary okuw mekdebi bilen hyzmatdaşlykda ýaş eminleri ýüze çykarmak we olary kämilleşdirmek ugrunda täze maksatnamany durmuşa geçirip başlady. Bu okuw çäresine futbol emininiň ugruny saýlap alan 30-a golaý talyp gatnaşyp, olar häzirki wagtda eminlik sungatynyň nazary we amaly esaslaryny özleşdirýärler. Okuwlary halkara derejeli tejribeli hünärmenler we dünýä taryhynda yz galdyran eminler alyp baryp, ýaşlara oýun kadalarynyň inçe syrlaryny öwredýärler.
Okuw tapgyryny üstünlikli tamamlan ýaş hünärmenler geljekde ýurdumyzyň iň jogapkärli bäsleşiklerinde işlemek hukugyna eýe bolarlar. Olaryň hataryna futbol boýunça ýurt çempionatynyň, Türkmenistanyň Kubogynyň we futzal boýunça ýokary liganyň duşuşyklary girýär. Bu başlangyç milli sportumyzyň eminlik düzümini ýaş we zehinli kadrlar bilen baýlaşdyrmaga, şeýle hem ýaryşlaryň geçiriliş derejesini dünýä ölçeglerine laýyk getirmäge gönükdirilendir.
Şeýle hem okanyň
Gyrgyzystanda geçirilen VI Bütindünýä çarwadarlar oýunlary dabaraly ýagdaýda tamamlandy. Dünýäniň 106 ýurdundan 3 müňe golaý türgeniň gatnaşmagynda geçen bu halkara etnosport ýaryşynda Türkmenistanyň milli ýygyndysy uly üstünlik gazandy. Biziň pälwanlarymyz bäsleşikleriň netijeleri boýunça 2 altyn, 3 kümüş we 6 bürünç — jemi 11 medal eýeläp, umumy medal sanawynda 7-nji orny eýelediler. Меdal toplamakda birinji orny Gazagystan, ikinji orny Gyrgyzystan, üçünji orny bolsa Russiýa eýeledi.
Milli ýygyndymyzyň türgenleri milli göreş, kuraş, alyş, ssirym, gazak we azerbaýjan göreşleri ýaly ugurlarda tapawutlandylar. Bäsleşikleriň maksatnamasy diňe bir güýç synanyşyklaryny däl, eýsem kök-börü, er-eňiş, guşly aw oýunlary we «otly çapyksuwar» şowusy ýaly täsirli medeni dabaralary hem öz içine aldy. Ýapylyş dabarasynda dron şüweleňi we halkara konsert geçirildi, şeýle hem nobatdaky VII Oýunlary 2028-nji ýylda geçirmek gezegi Russiýanyň Kazan şäherine gowşuryldy.
Şeýle hem okanyň
Blitz