Türkmenistanyň futbol boýunça milli ýygyndysy Aziýa Kubogy — 2027-niň saýlama tapgyrynyň iň möhüm oýnunda şowsuzlyga uçrady. 31-nji martda Bangkok şäheriniň «Rajamangala» stadionynda geçirilen duşuşykda meýdan eýeleri bolan Tailandyň topary türkmen futbolçylaryndan 2:1 hasabynda üstün çykdy. Bu ýeňliş Türkmenistanyň yklymyň iň abraýly ýaryşynyň final tapgyryna barmak baradaky umytlaryny puja çykardy.

Oýnuň birinji ýarymy Tailandyň güýçli hüjümleri bilen başlandy we eýýäm 14-nji minutda hasap açyldy. S. Burirat burçdan depilen topy oňaýly peýdalanyp, kellesi bilen uran zarbasy arkaly derwezäni takyk nyşana aldy. Ikinji ýarymda Türkmenistanyň ýygyndysy oýun badyny artdyryp, 60-njy minutda hasaby deňlemegi başardy. Timur Çaryýew jerime meýdançasynyň daşyndan uran güýçli we owadan zarbasy bilen hasaby 1:1 görnüşine getirdi.

Emma duşuşygyň iň soňky minutlary Türkmenistan üçin agyr netije bilen tamamlandy. Oýnuň 89-njy minutynda, ýagny esasy wagtyň gutarmagyna sanlyja pursatlar galanda, M. Bir burçdan çykarylan topy kellesi bilen urup, Tailandyň ýygyndysyna ýeňiş getiren goly geçirdi. Bu gol Tailandy 2:1 hasabynda öňe çykaryp, olaryň Aziýa Kubogyna barýan ýoluny açdy.

Turnir jedweliniň netijelerine görä, Tailand 15 utuk bilen «D» toparynda birinji ýeri eýeledi we 2027-nji ýylda Saud Arabystanynda geçiriljek ýaryşa gatnaşmaga hukuk gazandy. Aşgabatda geçirilen ilkinji oýunda 3:1 hasabynda ýeňiş gazanan Türkmenistana bu gezek deňme-deň hasap hem ýeterlik boljakdy, emma şowsuzlyk toparymyzy 12 utuk bilen ikinji orunda galdyrdy. Şri-Lanka 9 utuk bilen üçünji, Hytaý Taýbeýi bolsa utuksyz soňky orny eýeledi.