Halkara futbol federasiýasy (FIFA) öz taryhynda ilkinji gezek täjirçilik çaklamalary ulgamynda ýöriteleşen «ADI Predictstreet» kompaniýasy bilen strategik şertnama baglaşdy. Birleşen Arap Emirliklerinde ýerleşýän bu gurama bilen baglaşylan köp ýyllyk geleşigiň maliýe bahasynyň 300 milliondan 400 million dollara çenli ýetýändigi habar berilýär. Bu ädim dünýä futbolynyň dolandyryjy edarasynyň sanly tehnologiýalar we janköýerleriň interaktiw gatnaşygy ugrundaky täze strategiýasynyň bir bölegidir.

Täze hyzmatdaşlygyň esasy ugry 2026-njy ýyldaky Dünýä çempionatynyň çäginde blokçeýn tehnologiýasyna esaslanýan global çaklama platformasyny döretmekden ybaratdyr. Aprel aýynda resmi taýdan işe giriziljek bu programma üpjünçiligi FIFA-nyň uly maglumatlar bazasyny ulanyp, janköýerlere oýunlaryň netijeleri we futbolçylaryň görkezijileri boýunça bäsleşmäge mümkinçilik berer. Platforma dünýäniň ähli künjeklerinden gatnaşyjylar üçin elýeterli bolup, futbol janköýerleriniň täze neslini özüne çekmegi maksat edinýär.

Halkara bilermenler bu geleşigiň strategik ähmiýeti bilen bir hatarda, az tanalýan we diňe Gibraltarda ygtyýarnamasy bolan kompaniýanyň saýlanmagyna üns çekýärler. Şol sebäpli, ulgamyň howpsuzlygyny we açyklygyny üpjün etmek üçin «Sportradar» ýaly abraýly tehnologik firmalaryň mümkinçiliklerinden peýdalanylmagyna garaşylýar. Şeýle-de, bu taslamanyň Abu-Dabiniň iri holdingleri bilen baglanyşykly bolmagy, Ýakyn Gündogaryň maýa goýumlarynyň dünýä sportundaky täsiriniň yzygiderli artýandygynyň nobatdaky subutnamasydyr.

2026-njy ýylyň Dünýä çempionatyna taýýarlyk görülýän döwürde FIFA özüniň rekord derejedäki 8,9 milliard dollar girdeji meýilnamasyny durmuşa geçirmegi dowam etdirýär. Üç ýurduň çäginde geçiriljek ýaryşyň umumy baýrak gaznasy hem taryhy derejä — 655 million dollara çenli ýokarlandyryldy. Täze sanly platformanyň işe girizilmegi bolsa, diňe bir maliýe girdejilerini däl, eýsem halkara futbol ýaryşlarynyň sanly giňişlikdäki täsirini hem giňelder.