Aziýa ösüş banky (ADB) Türkmenistanda şepagat uýasy we enelik hyzmatlarynyň ösüşine gönükdirilen taslama üçin $75 million karz serişdesini we Aziýa-Tyhý Okean sebitiniň durnukly ösüşine goldaw berýän Ýapon gaznasyndan (JFPR) $2 million möçberinde grant serişdesini tassyklady. Bu barada bankyň resmi beýannamasynda habar berilýär.

Bu ADB tarapyndan ýurdumyzda saglygy goraýyş ulgamynda durmuşa geçiriljek ilkinji taslama bolup, onuň maksady şepagat uýasy hünäriniň derejesini ýokarlandyrmak we ilatyň ýokary hilli lukmançylyk hyzmatlaryna elýeterliligini giňeltmekdir.

Taslama laýyklykda, Aşgabatda häzirki zaman enjamlary bilen üpjün edilen, interaktiw okuw we tejribe otaglaryny öz içine alýan täze şepagat uýasy mekdebi gurular. Şeýle hem, desganyň düzümine eneler üçin howpsuz bölüm, talyp ýaşlar üçin umumy ýaşaýyş jaýy we sagdyn iýmitlenmäni wagyz edýän miweli bagçylyk girer.

Okuw maksatnamalary halkara ülňülerine laýyklykda täzelenip, täze okuw we lukmançylyk enjamlary satyn alynar. Şonuň bilen birlikde, mugallymlar we tejribeli şepagat uýalary üçin hünär derejesini ýokarlandyrýan okuwlar guralar.

Taslamanyň umumy bahasy $98 million bolup, onuň $23 milliony Türkmenistanyň hökümeti tarapyndan maliýeleşdiriler. Türkmenistandaky ADB-niň ýurt boýunça müdiri Artur Andrisýak bu başlangyjy bank bilen ýurt arasynda durnukly hyzmatdaşlygyň subutnamasy hökmünde häsiýetlendirdi.