Russiýa Federasiýasynyň Tatarstan Respublikasynyň Kazan şäherinde geçirilýän «Russiýa — Yslam dünýäsi: KazanForum» halkara ykdysady forumynyň çäginde «Kazan halal bazary» atly halkara sergi-ýarmarkasy açyldy. Bu çärä dünýäniň dürli döwletleri bilen bir hatarda Türkmenistan hem özüniň täze sepgitlerini we milli gymmatlyklaryny açyp görkezýän Milli pawilýony bilen gatnaşýar. Serginiň açylyş dabarasynda Tatarstanyň Baştutany Rustam Minnihanow we beýleki ýokary derejeli myhmanlar gatnaşyp, olar gatnaşyjy ýurtlaryň sergi diwanlary bilen tanyş boldular.

Tatarystanyň ýolbaşçysy Rustam Minnihanow sergi bilen tanyşlygyň dowamynda Türkmenistanyň Milli pawilýonyna aýratyn üns berdi. Pawilýonda ýerleşdirilen eksponatlar ýurdumyzyň ykdysady ösüşlerini, senagat mümkinçiliklerini we baý medeni mirasyny aýdyň şöhlelendirýär. Ýokary derejeli myhman Türkmenistanyň sergi diwanynyň bezelşine we hödürlenilýän önümleriň hiline ýokary baha berip, ikitaraplaýyn hyzmatdaşlygyň ösdürilmeginde şeýle çäreleriň ähmiýetini belledi.

Milli pawilýonda geçirilen duşuşygyň barşynda Tatarystanyň Baştutanyna türkmen halkynyň buýsanjy bolan nepis el halysy sowgat berildi. Sowgat gowşurylyş dabarasynda Türkmenistan bilen Tatarstanyň arasyndaky dostlukly we doganlyk gatnaşyklaryň mundan beýläk-de berkidiljekdigine ynam bildirildi. Bu halkara çäre diňe bir täjirçilik gatnaşyklary däl, eýsem sebitleriň arasyndaky medeni-ynsanperwer gatnaşyklaryň hem täze derejä çykmagyna şert döredýär.

Şu ýylky «Kazan halal bazary» sergi-ýarmarkasyna Russiýanyň 11 sebitinden 100-den gowrak kompaniýa hem-de daşary ýurtly işewür toparlaryň wekilleri gatnaşýarlar. Türkmenistanyň bu forumda yzygiderli wekilleçilik etmegi ýurdumyzyň halkara söwda meýdançalaryndaky ornuny has-da berkidýär. Sergi öz işini dowam etdirýär we ol talyplar, hünärmenler hem-de halkara bilermenler üçin özara tejribe alyşmak we täze ylalaşyklary baglaşmak üçin amatly meýdança bolup hyzmat edýär.