6-njy dekabrda geçirilen Ministrler Kabinetiniň giňişleýin mejlisinde Türkmenistanyň Prezidenti ýurduň 2026-njy ýyl üçin halkara işiniň esasy ugruny mälim etdi. Indiki ýylda esasy wezipeleriň biri hökmünde Türkmenistanyň başlangyjy bilen BMG Baş Assambleýasy tarapyndan kabul edilen Kararnamalary durmuşa geçirmek we olaryň mazmunyny ilerletmek kesgitlendi.

TDH-nyň maglumatyna görä, häzirki wagtda Türkmenistan Birleşen Milletler Guramasy bilen birnäçesi strategiki häsiýetli bolan bilelikdäki taslamalary durmuşa geçirýär. Döwlet Baştutany «Türkmenistan — BMG» Strategiki maslahat beriş geňeşiniň hyzmatdaşlygy özara utgaşdyrmakda möhüm ornuny aýratyn nygtady.

Prezidentiň belleýşi ýaly, goňşy döwletler bilen gatnaşyklar öňdebaryjy ugurlaryň biri bolmagynda galýar. Türkmenistan Merkezi Aziýa we Hazarýaka ýurtlary bilen doganlyk gatnaşyklaryny, hoşniýetli goňşuçylygy hem-de birek-birege hormat goýmak tejribesini mundan beýläk hem pugtalandyrar. Mundan başga-da, Ykdysady Hyzmatdaşlyk Guramasyna agza ýurtlar bilen energetika, ulag, aragatnaşyk we söwda ugurlarynda hyzmatdaşlyk giňeldiler.

Döwlet Baştutany Günorta Aziýa, Ýakyn we Orta Gündogar hem-de Aziýa–Ýuwaş ummany sebitleri bilen gatnaşyklary güýçlendirmegiň möhüm ähmiýete eýedigini aýtdy. Bu sebitlerde ösdürilýän täze tehnologiýalar we ykdysady ösüşler ýurtlaryň Türkmenistana bolan gyzyklanmasyny artdyrýar.

Aziýadan Ýewropa uzalyp gidýän «Beýik Ýüpek ýoly» ulag strategiýasynyň durmuşa geçirilmegi hem 2026-njy ýylyň möhüm ugurlarynyň biri hökmünde görkezildi. Prezident Ýewropa döwletleri bilen deňhukukly, özara peýdaly gatnaşyklaryň dowam etdirilmelidigini, ýokary tehnologiýalar, ýaşyl energetika we emeli aň boýunça tejribe alyşmagyň möhüm bolup durýandygyny belledi. Şeýle hem Demirgazyk we Günorta Amerika bilen Afrika döwletleri bilen hyzmatdaşlygyň yzygiderli ösdürilmegi zerur diýip nygtady.