Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurduň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň nobatdaky mejlisini geçirdi. «Watan» habarlar gepleşiginde bellenilişi ýaly, bu wajyp maslahatda ýurtda alnyp barylýan wagyz-nesihat işleriniň netijeleri we milli ynsanperwerlik ýörelgelerini has-da dabaralandyrmagyň esasy ugurlary giňişleýin ara alnyp maslahatlaşyldy.

Mejlisiň dowamynda halkymyzyň ýaşaýyş-durmuş şertlerini yzygiderli gowulandyrmak, sebitleri oňyn ösdürmek, köp çagaly maşgalalara döwlet tarapyndan berilýän goldawlary we ýeňillikleri artdyrmak hem-de howandarlyga mätäç çagalara hossarlyk etmek ýaly rüstem wezipelere seredildi. Şeýle hem obadyr şäherlerimiziň durmuş düzümini döwrebaplaşdyrmak barada netijeli pikir alşyldy. Mejlise gatnaşyjylar tarapyndan öňe sürlen teklipler göz öňünde tutulyp, jemgyýetçilik bähbitli birnäçe möhüm çözgütler kabul edildi.

Mejlisiniň dabaraly böleginde türkmen halkynyň Milli Lideri ýaşulularyň jemgyýetde asylly nesilleri terbiýelemekdäki egsilmez ornuny aýratyn belledi. Gahryman Arkadagymyz gün tertibine girizilen meseleleriň doly seredilendigini yglan edip, ýaşulularyň we gaznanyň agzalarynyň alyp barýan ynsanperwer işlerine ýokary baha berdi hem-de hemmelere ýurdumyzyň mundan beýläk-de gülledip ösdürilmeginde, ýaşlary watansöýüji, belent ahlakly we kämil nesiller edip ýetişdirmekde uly üstünlikleri arzuw etdi.