Şu ýylyň 14-15-nji maýynda Russiýa Federasiýasynyň Tatarstan Respublikasynyň Kazan şäherinde «Russiýa — Yslam dünýäsi: KazanForum 2026» atly XVII halkara ykdysady forumy guralar. Bu abraýly çärä Türkmenistanyň resmi wekiliýeti hem gatnaşyp, ýurdumyzyň halkara hyzmatdaşlygyndaky strategik ornuny tassylylar. Forum Russiýa bilen Yslam Hyzmatdaşlyk Guramasyna agza döwletleriň arasyndaky ykdysady gatnaşyklary berkitmekde esasy meýdança hasaplanýar.

Forumyň işewürlik maksatnamasynyň çäklerinde energetika, ulag-logistika, sanly ykdysadyýet we dokma senagaty ýaly möhüm pudaklar boýunça maslahatlar geçiriler. Şeýle hem saglygy goraýyş, gurluşyk we syýahatçylyk ugurlarynda täze maýa goýum taslamalarynyň tanyşdyrylyşy bolar. Bu çäre gatnaşyjy ýurtlaryň işewür toparlarynyň arasynda göni gatnaşyklary ýola goýmaga we özara bähbitli şertnamalary baglaşmaga mümkinçilik berer.

Halkara çäräniň iň ähmiýetli wakalarynyň biri hem «Russiýa — Yslam dünýäsi: Hyzmatdaşlyk Expo» atly sergi bolar. Bu sergi meýdançasynda Türkmenistanyň Milli pawilýony ýörite gurnalar. Milli pawilýonyň dizaýnyny we many-mazmunyny ýokary halkara standartlaryna laýyklykda taýýarlamak işleri Türkmenistanyň Söwda-senagat edarasy tarapyndan amala aşyrylýar.

Milli ekspozisiýada Türkmenistanyň soňky ýyllarda gazanan üstünlikleri, eksport harytlarynyň dürli görnüşleri we ýurdumyzyň maýa goýum özüne çekijiligi görkeziler. Bu halkara tanyşdyrylyş türkmen önümleriniň daşary ýurt bazarlaryndaky ornuny berkitmäge hem-de dünýä bileleşigine ýurdumyzyň döwrebap ösüşlerini aýdyň şöhlelendirmäge ýardam eder.