Italiýanyň Torre-Lapillo atly kenarýaka şypahanasynda 57 ýaşly bir adam takmynan 120 müň ýewro gymmatyndaky 20 sany altyn bölegi bolan gutyny ýalňyşlyk bilen zibile taşlapdyr. Bu barada RMF24 portaly habar berýär.

Habarlara görä, ol birnäçe ýyl bäri ýygnan serişdelerini altyna öwürip gelipdir we ähli bölekleri adaty demir gutuda saklapdyr. Öýüni arassalaýan wagty guty başga zatlar bilen bilelikde çykarylyp, zibil konteýnerine düşüpdir. Gymmatly zatlarynyň ýokdugyny diňe ertesi gün duýup, derrew polisiýa ýüz tutupdyr.

Wideogözegçilik ýazgylary gutynyň hakykatdan hem zibile taşlanandygyny tassyklapdyr. Şeýle-de bolsa, şol wagta çenli ähli galyndylar Udžento şäherindäki uly zibilhana alnyp gidilipdir.

Zibilhanada giň gerimli gözleg işleri geçirildi: ýörite gulluklar agyr tehnikanyň kömegi bilen tonnalap hapalary dörüp çykardylar. Netijede, guty tapyldy we onuň içindäki 20 sany altyn bölegi doly ýagdaýda saklanyp galypdyr.

Şeýle ýagdaý ilkinji gezek ýüze çykmaýar. 2021-nji ýylda ABŞ-nyň Edmonton şäherindäki galereýadan bäş sany gymmat bahaly surat, şol sanda Žan-Pol Riopeliň 50 müň dollarlyk eseri ýitipdi. Dört ýyl geçenden soň, 2025-nji ýylda bir nätanyş adam şol suratlaryň birini Nýu-Ýorkdaky auksionda satmaga synanyşdy. Ol eseri zibilhanadan tapandygyny we öýünde saklandygyny aýtdy. Polisiýa maglumatlary bilen tanyşandan soň, ol suraty meýletin ýagdaýda ätiýaçlandyryş kompaniýasyna gowşurypdyr.