Aşgabatda möhüm medeni waka bolup geçdi — ilkinji gezek meşhur fransuz pianisti Kristin Fonlýupt paýtagtda çykyş etdi. Konsert Türkmenistanyň Döwlet simfoniki orkestri bilen bilelikde geçirildi we nusgawy saza höwes edýänleriň uly gyzyklanmasyny döretdi.

 

Aýdym-sazly agşam 10-njy aprelde Magtymguly adyndaky milli sazly drama teatrynda geçirildi. Zala giren ilkinji pursatlardan başlap, tomaşaçylaryň bu çärä bolan uly gyzyklanmasy duýuldy — ýerler doly diýen ýaly bolup, çykyş başlanmagyna sabyrsyzlyk bilen garaşdylar.

 

Konsertiň maksatnamasynda fransuz nusgawy sazynyň görnükli eserleri ýerine ýetirildi. Klod Debýussi, Žorž Bize, Moris Rawel, Sesil Şaminad we Mel Boni ýaly kompozitorlaryň eserleri pianino we orkestriň ýerine ýetirmeginde ýaňlandy. Her bir çykyş uly el çarpyşmalar bilen garşylandy.

 

Kristin Fonlýuptyň ýerine ýetiriş ussatlygy aýratyn üns çekdi. Ol häzirki zaman fransuz pianino sungatynyň iň görnükli wekilleriniň biri hasaplanýar. Onuň ýerine ýetirilişi duýgulara baýlygy, inçe tehnikasy we çuň manylylygy bilen tapawutlandy.

 

Konsertiň baş hemaýatkäri — halkara syýahatçylyk we wiza hyzmatlaryny hödürleýän LeTravel kompaniýasy bolup, ol syýahatlary guramakda, wiza goldawynda hem-de ýolagçylary ähli tapgyrda goldamakda ýöriteleşendir.

 

Konsertiň ahyrynda tomaşaçylar sungat işgärlerini uzak wagtlap el çarpyşmalar bilen goldadylar. Bu çykyş Aşgabatda halkara medeni hyzmatdaşlygyň we nusgawy saz sungatyna bolan gyzyklanmanyň artýandygyny görkezýän möhüm waka boldy.