Türkiýäniň günorta-gündogar sebitindäki Göbekli-Tepe diýen gadymy ybadathana toplumynda geçiriş işleri wagtynda arheologlar 12 müň ýyl öňki adamlaryň dini nyşany bolup durýan heýkeli ýüze çykardylar.

Bu açyş barada ýurduň Medeniýet we syýahatçylyk ministri Mehmet Nuri Ersoý habar berdi. Onuň sözlerine görä, tapylan heýkel neolit döwrüniň ynançlaryny we rituallaryny has gowy düşündirmäge kömek eder.

Heýkel binanyň diwaryna ýatyk ýagdaýda ýerleşdirilipdir we arheologlar muny gurban beriş däp-dessury bilen baglanyşdyrýarlar. Tapyndy toplumyň B we D bölekleriniň arasynda ýüze çykaryldy. Heýkeliň kellesi we döş bölegi saklanyp galan, aýaklary bolsa ýok — munuň sebäbi wagtyň geçmegi bilen zaýalanmak ýa-da ýörite aýrylmak bolup biler diýip, Anadolu agentligi habar berýär.

Göbekli-Tepe häzirki wagtda dünýäde iň gadymy dini toplum hasaplanylýar — ol Stoунhenjdеn 6 müň ýyl, Müsür piramidalaryndan bolsa 7 müň ýyl öň bina edilipdir. Alymlar ony b.e.ö. 9600 – 8200-nji ýyllar aralygynda gurlandyr diýip çaklaýarlar.

2018-nji ýyldan bäri bu toplum UNESCO-nyň Bütindünýä mirasynyň sanawyna girýär. Toplumda diametri uly tegelek gurluşlar, uzynlygy 6 metre, agramy bolsa 10 tonna çenli ýetýän T görnüşli daş sütünler ýerleşýär. Bu sütünleriň ýüzünde haýwanlaryň şekilleri we abstrakt nyşanlar çyzylan. Alymlar bu açyşlaryň irki jemgyýetleriň arhitektura we astronomiýa bilen çuňňur gyzyklanandygyny görkezýändigini belleýärler.