Paýtagtymyzda geçirilen işjeň gepleşikleriň barşynda Türkmenistan bilen Azerbaýjan Respublikasynyň arasynda bilim we ylym ugrunda hyzmatdaşlygy mundan beýläk-de ösdürmegiň ýollary seljerildi. Iki ýurduň degişli ministrlikleriniň ýolbaşçy wekilleriniň gatnaşmagynda bolan duşuşykda bilim ulgamynda amala aşyrylýan özgertmeleriň netijeleri we bu ugurdaky tejribe alyşmagyň ähmiýeti nygtaldy.

Gepleşikleriň dowamynda häzirki zaman bilim usulyýetini kämilleşdirmek, esasanam, sanly tehnologiýalary hem-de emeli aňy okuw işine giňden ornaşdyrmak meselelerine aýratyn üns berildi. Taraplar sanlylaşdyrmak işiniň bilim bermegiň hilini ýokarlandyrmakdaky we ýaş hünärmenleriň dünýä derejesindäki täze bilimlere eýe bolmaklaryndaky ornuna ýokary baha berdiler.

Ikitaraplaýyn duşuşygyň çäklerinde geljekde durmuşa geçiriljek bilelikdäki taslamalaryň we meýilnamalaryň ugurlary kesgitlenildi. Taraplar ylmy-barlag işlerinde, mugallymlaryň we talyplaryň özara gatnaşyklaryny işjeňleşdirmekde uly mümkinçilikleriň bardygyny tassykladylar. Bu gatnaşyklaryň pugtalandyrylmagy goşny ýurtlaryň bilim düzümleriniň özara baýlaşmagyna ýardam eder.

Gepleşikleriň netijeleri boýunça bilim ulgamyndaky möhüm wezipeleri çözmäge gönükdirilen anyk teklipler işlenip taýýarlanyldy. Bellenilişi ýaly, ylym-bilim ugry boýunça alnyp barylýan bu hyzmatdaşlyk iki döwletiň arasyndaky dostlukly gatnaşyklaryň has-da berkemegine hyzmat eder. Öňde goýlan maksatlar geljekde netijeli ylmy gatnaşyklaryň binýadyny döretmäge gönükdirilendir.