Şu gün Aşgabatda «Howanyň üýtgemegi şertlerinde saglyk we iýmitleniş» atly halkara maslahat geçirildi. Bu çäre Türkmenistanyň howanyň üýtgemegi bilen baglanyşykly meselelerde halkara hyzmatdaşlygy pugtalandyrmaga gönükdirilen tagallalarynyň nobatdaky beýany boldy. Maslahata Türkmenistanyň degişli ministrlikleriniň we edaralarynyň ýolbaşçylary, BMG-niň Azyk we oba hojalygy guramasynyň wekilleri, şeýle hem Gazagystan, Gyrgyzystan, Özbegistan, Täjigistan, Eýran we Russiýa döwletlerinden gelen wekiliýetler gatnaşdylar. Bu barada «Watan» habarlar gepleşiginde habar berildi.

Maslahatda çykyş edenler howanyň üýtgeýän şertlerinde azyk howpsuzlygynyň üpjün edilmeginiň durnukly ösüş maksatlary bilen aýrylmaz baglanyşyklydygyny bellediler. Klimat faktorlarynyň oba hojalygynyň däp bolan ýörelgelerine we önümçilik usullaryna edýän täsiri täze çemeleşmeleri we utgaşdyrylan çözgütleri talap edýär.

Şeýle-de howanyň üýtgemeginiň saglyk we iýmitleniş bilen baglanyşykly meseleleri has-da ýitileşdirýändigi nygtaldy. Şunuň bilen baglylykda, howanyň üýtgemegine garşy göreşmek boýunça bilelikdäki çäreleri güýçlendirmek, ekoulgamlary goramak hem-de ilaty arassa suw, energiýa, howpsuz howa we ýokumly iýmit bilen üpjün etmek boýunça umumy maksatlary amala aşyrmagyň zerurlygy bellenildi. Daşary ýurtly gatnaşyjylar bu ugurda netijeli çözgütleriň mümkinçiliklerini giňişleýin beýan etdiler.