Aşgabatdaky Hindistanyň medeni gatnaşyklar geňeşiniň (ICCR) döredilmeginiň 77 ýyllygy mynasybetli dabaraly çäre geçirildi. Bu çäre diplomatik wekilleri, talyplary, medeniýet işgärlerini hem-de Hindistan bilen medeni gatnaşyklara gatnaşýan ähli adamlary bir ýere jemledi.

 

Çäre ICCR guramasynyň alyp barýan işleri barada taýýarlanan wideorolik bilen başlandy. Wideoda guramanyň halkara derejesindäki bilim maksatnamalary, medeni başlangyçlary hem-de ýaşlara hödürleýän mümkinçilikleri giňişleýin görkezildi.

 

Hindistan Respublikasynyň Türkmenistandaky Adatdan daşary we Doly ygtyýarly ilçisi Bandaru Wilsonbabu çykyş edip, ICCR-yň ýurtlaryň arasynda medeni gatnaşyklary ösdürmekdäki möhüm ornuny belledi. Ol guramanyň geljekde hem bilim, medeni we gysga möhletli alyş-çalyş maksatnamalaryny giňeltjekdigini aýtdy.

 

Çäräniň dowamynda tomaşaçylara ýoga çykyşlary hödürlendi. Bu çykyşlar diňe bir sport däl, eýsem sungat hökmünde-de uly gyzyklanma döretdi. Şeýle hem hind milli tanslary ýerine ýetirildi. Hind aýdymlary türkmen aýdymçysy Täçnabat Ýomudowa tarapyndan ýerine ýetirilip, tomaşaçylaryň uly gyzyklanmasyna eýe boldy.

 

Mundan başga-da, ICCR maksatnamalarynyň gatnaşyjylary çykyş edip, Hindistanda okan döwürleri we gazanan tejribeleri barada gürrüň berdiler. Olar bu maksatnamalaryň özlerine täze mümkinçilikleri açandygyny aýratyn nygtadylar.

 

Çäräniň ahyrynda myhmanlara hind milli tagamlary hödürlenildi. Bu bolsa dabaranyň dostlukly we ýyly ýagdaýda dowam etmegine ýardam berdi.

 

ICCR-yň esaslandyrylmagynyň 77 ýyllygynyň bellenilmegi Türkmenistan bilen Hindistanyň arasynda medeni gatnaşyklaryň has-da pugtalandyrylýandygyny görkezýän möhüm waka boldy.